एकीकृत माओवादीका अध्यक्ष पुष्पकमल दाहाल 'प्रचण्ड'ले सम्झौता र संघर्षबाट नै अधिकार प्राप्त हुने हुँदा मधेशी जनताले संघर्षबाटै संविधान मार्फत आफ्नो अधिकार लिनुपर्ने कुरामा जोड दिएका छन्।
बाराको सिम्रौनगढमा गत असोज २५ गते प्रहरीको गोली लागेर मृत्यु भएका हरिहरपुर ४ निवासी जयनारायण पटेलको श्रद्धाञ्जली सभालाई सोमबार सम्बोधन गर्दै अध्यक्ष दाहालले मधेशबाटै आफूले संविधान सभामा जितेको हुँदा मधेशप्रति आफ्नो जिम्मेवारी बढेको बताए।
प्रचण्डले मधेसी, आदिवासी र माओवादी मिले नेपाल आफ्नो हातबाट बाहिर नजाने बताएका छन्। उनले दिल्लीले मधेसीको कुरा मात्र नसुन्ने भन्दै माओवादी र मधेसी एक भएर जानुपर्ने अहिलेकेा आवश्यकता रहेको बताए। श्रद्धान्जली सभामा प्रचण्डले भने–'मधेसी, आदिवासी जनजाति, दलित र माओवादी एक भए दुनियाँको कुनै पनि तागतले हामीलाई हराउन सक्दैन।'
हिन्दीमा भाषण सुरु गरेका प्रचण्डले बीच-बीचमा नेपालीमा बोलेका थिए। उनले मधेसी र पहाडी एक भएर पहिचान र अधिकारको लडाइ लड्नुपर्ने बताए। मधेसीहरूको कुरा दिल्लीले नसुन्ने भन्दै उनले भ्रममा नबस्न आग्रह समेत गरे।
दिल्लीका शासकहरुको सम्वन्ध नेपालका राणा ठकुरीहरुसँग रहेको भन्दै उनले भने–'उनीहरुको कुरा सुन्न छाडेर दिल्ली मजदुर गरिब मधेसीको कुरा किन सुन्छ? दिल्लीले तपाईको कुरा सुन्दैन।'कांग्रेस र एमाले सरकारलाई 'अन्धो र बहिराहरुको सरकार' भन्दै उनले माओवादी र मधेसी मिलेर दिल्लीलाई भनेपछि काठमाडौंको सरकारले सुन्ने बताए।
'काठमाडौंले सिम्रौनगढको वीरता र वैभवलाई मान्यता दिएन' सरकारमा मधेसी भन्ने शब्द सुन्न नचाहने मानिसहरु रहेको भन्दै उनले भने–'हुन त म पहाडको पनि हुँ। बाहुनको छोरा पनि हुँ र कम्युनिष्ट पनि हुँ। अब नयाँ आन्दोलन गरेर सिंहदरवारको अन्धो र बहिरो शासकलाई भत्काउन सकिन्छ।'
एमाओवादी अध्यक्ष प्रचण्डले माओवादी र मधेसीबीच फुट ल्याउने प्रयास भइरहेको भन्दै यो आफूसँगै मधेसी नेताका लागि समेत अग्नी परीक्षा भएको बताए। मधेस केन्द्रित दलहरुलाई भारतले जे भन्छ त्यही मान्न भन्दै आफूलाई किन मधेसीलाई बोकेर हिडेको भनेर आफूलाई प्रश्न आउने गरेको उनले सुनाए।
उनले भने–'मधेसीलाई किन प्रचण्ड जस्तो फटाहको पछि लागेको भनिन्छ। मधेसी, आदिवासी जनजातिलाई अधिकार दिने कि नदिने भन्ने बहस भइरहेको भन्दै उनले कांग्रेस र एमाले विगतको सम्झौता तोड्न लागेको आरोप लगाए।
कार्यक्रममा मधेशी जनअधिकार फोरम नेपालका अध्यक्ष उपेन्द्र यादवले विगतमा मधेशबाट धेरै नेताहरु प्रधानमन्त्री बने पनि उनीहरुले मधेशका लागि केहि नगरेको भन्दै विकास माग्न जादा मधेशी जनताले गोली खानु पर्ने अवस्था आउनु दुर्भाग्यपूर्ण भएको बताए।
श्रद्धाञ्जली सभामा सदभावना पार्टीका अध्यक्ष राजेन्द्र महतो, तराई मधेश लोकतान्त्रिक पार्टीका वरिष्ठ उपाध्यक्ष हृदेश त्रिपाठी, तराई मधेश लोकतान्त्रिक पार्टी सदभावनाका उपाध्यक्ष रामचन्द्र कुशवाहा, मधेशी जनअधिकार फोरम लोकतान्त्रिकका उपाध्यक्ष रामबहादुर चौधरी, मधेशी जनअधिकार फोरम गणतान्त्रिकका अध्यक्ष राजकिशोर यादव, माओवादीका अध्यक्ष मातृका यादव, सदभावना पार्टीका महासचिव सुरेश कुमार यादव लगायतका राजनीति दल तथा मधेशकेन्द्रित दलका नेताहरुले आ–आफ्नो मन्तव्य दिएका थिए।