नेकपा एमालेका अध्यक्ष एवम् संसदीय दलका नेता केपी शर्मा ओलीले प्रचण्डले संविधानसभाबाट संविधान आउन नदिन दोहोरो चरित्र निर्वाह गरिरहेको आरोप लगाएका छन।
रिपोर्टर्स क्लब नेपालको विशेष साक्षात्कार कार्यक्रममा उनले संविधान निर्माण गर्न लाग्छु भन्ने सर्तमा एमाओवादी प्रचण्डलाई राजनीतिक समितिको संयोजक बनाएको भन्दै अहिले उनी २२ दलका २२ सय मान्छे जम्मा गरेर माघ ८ गते संविधानसभाबाट संविधान जारी हुन नदिने षड्यन्त्रमा लागेको आरोप लगाएका छन् ।
देशलाई तल पारेर प्रचण्ड आफू ठूलो हुने योजनामा रहेको दावी गर्दै उनले भने–‘‘देशलाई तल पारेर ब्यक्तिलाई ठूलो पार्ने काम एमालेले कदापि गर्दैन र त्यो कुरा प्रचण्डले कल्पना नगरेपनि हुन्छ । ’’
रिपोर्टर्स क्लब नेपालले सहमतिमा संविधान जारी गर्न दवाव दिने उद्देश्यले आजबाट सुरु गरेको अभियान अन्तरगत क्लबका अध्यक्ष ऋषि धमलाको नेतृत्वमा गएको पत्रकारहरुको टोलीसँगको कुराकानीमा उनले सहमति नगर्ने किरिया खाएर एमाओवादी र मधेसवादी दलहरु बस्ने भए उनीहरुको आन्दोलनको सामना गर्दै प्रक्रियाबाट संविधान जारी गर्ने चेतावनी दिदै संविधान निर्माणको बेला कसैले कसैलाई धम्कि नदिन सुझाव दिए।
ओलीले भने–‘‘माओवादी सहमतिमा नआएपनि हामीसँग स्पष्ट बहुमत र दुई तिहाई छ । संख्याको आधारमा गएर भएपनि हामी संविधान जारी गरेरै छाड्छौं । विरोधलाई सामना गर्दै प्रक्रियाबाट संविधान जारी गछौ । कसैले रोक्न सक्दैन । सहमति गर्न बार्ता गर्नु पर्ने बेलामा आन्दोलन गर्नु राम्रो भएन । उहाँहरुले गलत काम गर्नु हुँदैछ । यसबाट ब्याक हुनु पर्छ ।’’ ओलीले प्रचण्ड आन्दोलनबाट ब्याक नभए विगतमा १० वर्षे जनयुद्धमा गएर पछुताए जस्तै पछुताउने समेत चेतावनी दिएका छन् ।
ओलीले ८० प्रतिशत जनताले लोकतान्त्रिक संविधान निर्माणको लागि प्रतिनिधि चुनेर पठाईसकेको बताउँदै फेरि पनि दुई चार जना असफल नेताहरुले जनमत संग्रहको माग गर्नुको कुनै अर्थ नभएको स्पष्ट पारेका छन् । उनले भने–‘‘चार जना नेता असफल हुँदैमा जनमत संग्रहको माग गर्नु भनेको फेरि पनि मुलुकमा वितण्डा मच्चाउन खोज्नु हो । यसको अहिले कुनै आवाश्यक छैन ।’’
उनले एमाओवादी र मधेसवादी दलले भने जस्तो धेरै प्रदेशमा मुलुकलाई नटुक्राउने स्पष्ट पार्दै चार प्रदेशमा लगिने बताए । आफू कोशी, राजधानी, गण्डकी र कर्णाली प्रदेशको पक्षमा रहेको बताउँदै सहमतिकोलागि बढीमा छ प्रदेशसम्म जान सकिने तर माओवादीहरु ६ प्रदेशमा नआए चार प्रदेशमा आफुहरु फर्कने चेतावनी दिए ।
‘‘राष्ट्रिय संसद भवन नभएर भाँडामा बस्नु परेको छ । १० प्रदेश बनाएर गर्भनर, मुख्य मन्त्री, मन्त्री, संसदको कार्यालय र आवास गृह अहिले बनाएर संघीयता संस्थागत गर्न सकिन्छ ?– ओलीले प्रश्न गरे । उनले मुलुक धेरै प्रदेशमा गए आउँदो १०० वर्ष प्रदेश निर्माण गर्नेमा समय खर्चिने समेत स्पष्ट पारेका छन् । ओलीले औषधी सेवन गरेझैं गरि विशेष स्फूर्ति देखाएर धेरै प्रदेश बनाउनुपर्छ भन्नु हाँस्यास्पद भएको समेत प्रष्ट पारेका छन् । उनले केन्द्रले स्रोत जुटाएर प्रदेश चलाउन नसकिने पनि बताएका छन् ।
उनले सानो देश नेपाललाई धेरैवटा संघीय राज्यमा लगेर फाईदा नभएको उल्लेख गर्दै सबैलाई चित्त बुझाउन आफूहरु संघीयतामा गएको समेत सो अवसरमा स्पष्ट पारे ।
ओलीले समग्र मधेस एक प्रदेश बनाउनेहरुले फापर फल्ने पहाडलाई धेरै टुक्रामा टुक्राउने कुरा गर्नु हास्यास्पद भएको भन्दै फापर फल्ने पहाड र अन्नको उर्वर भूमि तराई समेटेर प्रदेश बनाईने स्पष्ट पारे ।
पूर्वसहमति अनुसार प्रधानमन्त्री सुशिल कोइरालाले माघ ८ गते संविधान बने पनि नबनेपनि पद छाड्नु पर्ने भन्दै प्रधानमन्त्रीले संविधान जारी नभए आफूले पद नछाड्ने अभिब्यक्ति दिएको भन्नेमा आफूलाई विश्वास नभएको बताए ।
ओलीले भने–‘‘प्रधानमन्त्रीले माघ ८ गते संविधान जारी नभए पद छाड्दिन भन्नु भएको भए गलत भन्नु भएको हो । सहमति अनुसार प्रधानमन्त्रीले संविधान जारी भए पनि नभए पनि छाड्नु पर्छ । त्यसपछि एमालेको नेतृत्वमा सरकार बन्छ । प्रधानमन्त्रीले माघ ८ मै संविधान आउँछ भनेको भएर अहिले नै अविश्वास गर्नुहुँदैन । तर पनि अब प्रधानमन्त्री कोइरालाले माघ ८ गतेपछि पद छाड्नैपर्छ त्यसको विकल्प छैन ।’’
पार्टीभित्र माधवकुमार नेपाल र आफूवीच कुनै मतभेद नरहेको स्पष्ट पार्दै उनले महाधिवेशनको राप र ताप सेलाईसकेकोले अब एकताबद्ध भएर अघि बढ्ने समेत स्पष्ट पारे।
