राज्य विप्लव सम्बन्धी मुद्दामा हिरासतमा रहेका सिके राउतका आफन्त अदालतले मागेको धरौटी बुझाएर उनलाई छुटाउने पक्षमा छन्।
आइतबार प्रक्रिया बुझ्न राउतका एक आफन्त अदालत गए। तर राउत र उनका वकिलहरु भने अहिले नै धरौटी बुझाउने मनस्थितिमा देखिन्नन्।
उनीसँग विषेश अदालतले ५० हजार धरौटी मागेको थियो।
मधेसलाई छुट्टै राष्ट्र बनाउने अभियानमा लागेका राउतले अदालतमा वयान फेरेपछि विषेशले धरौटीमा छोड्ने आदेश गरेको थियो।
राउतले हिरासतमै बसेर सहानुभूति लिने र सरकारलाई दवाब सिर्जना गर्ने रणनीति अपनाएको देखिन्छ। अर्कोतर्फ जेलभित्र बसेर आफूमाथि लागेका वा लाग्न सक्ने मुद्दा माथि बार्गेनिङ गर्ने मुडमा पनि उनी देखिन्छन्।
राउतका वकिल दिपेन्द्र झाका अनुसार उनी धरौटी बुझाएर छुट्न चाहन्नन्। 'फेरि विद्युतीय कारोबारमा मुद्दा लागाउने तयारी छ, त्यसैले अहिले छुटे फेरि समात्छ भन्ने पनि हामीलाई लागेको छ,' राउतलाई उदृत गर्दै अधिवक्ता झाले सेतोपाटीसँग भने।
झाले आइतबारै डिल्लीबजार कारागार गएर राउतलाई भेटेका थिए। उनले राउतलाई उदृत गर्दै फेसबुकमा लेखेका छन, 'यदि म धरौटी राखेर रिहा हुने हो भने त्यसले गलत नजिर स्थापित हुन्छ। वाक स्वतन्वतन्त्रता पनि कुण्ठीत हुने डर हुन्छ। मान्छे बोल्नबाट डराउन थाल्छन्। म विरुद्ध लगाइएको सम्पूर्ण मुद्दाहरु फिर्ता नहुँदासम्म म जेल बस्न तयार छु।'
यसरि राउतका आफन्त र कानून व्यवसायी तथा अधिकारकर्मीहरुको बाटो अलग देखिएको छ।
'राउतका एकजना आफन्त धरौटी बुझाउने प्रक्रियाबारे सोध्न आउनुभएको थियो मैले सम्पूर्ण प्रक्रिया बुझाइदिएँ, दुईतीन दिनमै बुझाउनुहुन्छ कि जस्तो लाग्छ,' विषेशका रजिष्ट्रार नातिबाबु लामिछानेले भने।
आजै विहान राउतका दाजु जयकान्त राउतले अर्का वकिल सुरेन्द्र महतोलाई फोनमा धरौटी बुझाउने प्रक्रिया बारे सोधे। 'राउतजीले धरौटी बुझाउने नबुझाउने बारे सोच्दै हुनुुहुन्छ, हाम्रो भेट भने भएको छैन तर उहाँका दाजुसँग बिहान धरौटी बुझाउने प्रक्रियाका बारे कुरा भएको थियो,' महतोले भने।
मोरङको रङ्गेली नजिक पक्राउ परेका राउतले तराईलाई नेपालबाट अलग गराई मधेस राष्ट्र बनाउनुपर्ने बयान दिएका थिए। अदालतमा उनले कुरा फेरे।
'तराई मधेसलाई अलग्गै राष्ट्र नभै स्वायत्त राज्य बनाउने विचार व्यक्त गरेको हुँ,' राउतले भनेका थिए। आफूलाई प्रहरीले आफ्नो कार्यक्रमस्थल बाहिरैबाट पक्राउ गरेकोले राउतले रिहाई माग गरेका थिए।
बयान सुनेपछि विषेशले राउतलाई ५० हजार धरौटीमा रिहा गर्न आदेश गरेको थियो। अदालतले मागेको धरौटी नबुझाएकोले उनी हिरासतमा छन्।
नेपालबाट तराई अलग्याउने अभियान चलाएको आरोपमा प्रहरीले उनलाई साउन २९ गते पक्राउ गरेको थियो।
आफूलाई प्रहरीले कानुनविपरित पक्राउ गरेको भन्दै सर्वोच्च अदालतमा बन्दी प्रत्यक्षीकरणको रिट दिएका थिए। सर्वोच्चले तल्लो अदालतले कानुनबमोजिम पक्राउ गर्ने आदेश दिएकाले आफूले केही बोलिरहनु नपर्ने भन्यो।
सरकारले राज्य विप्लव गरेको आरोप लगाएर दायर गरेको मुद्दामा राउतलाई जन्मकैदको माग गरेको छ।
मधेस अधिकारवादीहरुले राउतको धरौटी रकमलाई आपसी एकता मजबुत बनाउने कडी बनाउन चाहेको छ। राउत बचाउ अभियान भन्दै आइतबारबाट सिरहामा एक/एक रुपैयाँ चन्दा उठाउने अभियान सुरु भएको छ।
