एमाओवादी उपाध्यक्ष नारायणकाजी श्रेष्ठले वरिष्ठ नेताहरूलाई समयमै बैठकमा आउन र समय दिन हाँक दिएका छन्।
नेताहरूले आफू समयमा नआउने उल्टै 'नेपाली समय' भन्दै नेपालकै बदनाम गरेको पनि उनले बताएका छन्।
सिंहदरबारमा शुक्रबार आयोजित कांग्रेस, एमाले र माओवादी शीर्ष नेताको सहमतिका लागि उच्चस्तरीय बैठकमा समय लिएर उनले नेताहरूको झाको झारेका छन्। 'तीन पार्टीको बैठक ९ बजे बोलाएको थियो, तर १० बजेमात्र सुरु भएपछि मैले समय लिएरै आज नेताहरूलाई आग्रह गर्नु परेको हो,' श्रेष्ठले सेतोपाटीसँग भने।
'नेपाली समय भन्दै मुलुककै अपमान गर्ने र समयको साह्रै उपेक्षा गर्ने काम भयो,' श्रेष्ठले बैठकमा भनेका थिए, 'म आज तपाईंहरूलाई गम्भीरतापूर्वक केही कुरा भन्न चाहन्छु।'
उनले व्यंग्यात्मक शैलीमा नेताहरूलाई भनेका थिए, 'तपाईंहरू ठूला राजनीतिक दलका नेता हुनुहुन्छ। समयमै संविधान दिन्छौं, देश बनाइदिन्छौं पनि भन्नु हुन्छ, राष्ट्रलाई समृद्धिको दिशामा लैजान्छौं पनि भन्नु हुन्छ। यहाँहरूजस्ता 'महान' नेता समयमा आउने र निर्धारित समयभित्र काम गर्ने हो भने यहाँहरूको महानता कम हुने थिएन।'
एक सामान्य नागरिकका रूपमा आफूले यी 'महान' नेतासँग काम गर्ने मौका पाए पनि समयमै आइदिए आफू अनुगृहित हुने धारणा समेत उनले व्यक्त गरेका थिए।
सबै कार्यक्रममा समयमा पुग्ने भनिएका एमाले वरिष्ठ नेता माधवकुमार नेपाल पनि समयमा आउन छाडेका छन्। अरू नेताहरू समयमा आउन छाडेपछि उनले पनि असन्तुष्टि प्रकट गर्न यसो गर्ने गरेको हुनसक्ने श्रेष्ठले बताए।
श्रेष्ठले समयमा आउन आग्रह गरेका बेला नेपालले समर्थन जनाएका थिए। कांग्रेस वरिष्ठ नेता शेरबहादुर देउवाले पनि 'ठीक हो' भनेका थिए। बैठक कांग्रेस नेता शेरबहादुर देउवा, रामचन्द्र पौडेल, कृष्ण सिटौला, एमाले अध्यक्ष केपी शर्मा ओली र माधवकुमार नेपाल र एमाओवादीका पुष्पकमल दाहाल, बाबुराम भट्टराई र श्रेष्ठबीच हुने गरेको छ।
प्रधानमन्त्री सुशील कोइराला अमेरिकाबाट फर्केर आएपछि बालुवाटारमा आयोजित शीर्ष नेताको बैठकमा एमाले अध्यक्ष ओली आउन ढिला गरेपछि श्रेष्ठ हिड्न तयार भएका थिए। कांग्रेस नेताहरूले प्रधानमन्त्री कोइरालालाई बोलाएपछि बल्ल बैठक सुरु भएको थियो। पछि ओलीले आफू आउन नभ्याउने जानकारी पठाएका थिए।
सार्वजनिक कार्यक्रममा पनि श्रेष्ठले अचेल समयमा पुग्न र करिब १५ मिनेटमा कार्यक्रम सुरु नभए छोडेर हिड्ने गरेका छन्। भर्खरै अन्नपूर्ण होटलमा आयोजित मानसिक स्वास्थ्यसम्बन्धी एउटा कार्यक्रममा प्रमुख शेरबहादुर देउवा र झलनाथ खनाल आउन ढिला गरेपछि उनी हिड्न लागेका थिए।
फेरि आयोजकले समयकै बारेमा बोल्न समय दिने भनेपछि मात्र उनी रोकिएका थिए। पार्टी र पार्टी मोर्चाहरूको बैठक पनि समयमा सुरु नभए उनी छाडेर हिड्ने गरेका छन्।
