उपप्रधानमन्त्री वामदेव गौतमले सरकार बालिकाहरुको सुरक्षा गर्न प्रतिबद्ध रहेको बताएका छन्।
सिविन–नेपाल, नेपाल वातावरण पत्रकार समाज, प्लान नेपाललगायत संस्थाले संयुक्त रुपमा तेस्रो अन्तर्राष्ट्रिय बालिका दिवसका अवसरमा आज यहाँ आयोजना गरेको कार्यक्रममा उनले छोरा र छोरी भनेर विभेद नगरी सरकारले जुनसुकै अवस्थामा पनि बालिकालाई सुरक्षा दिने बताए।
गृहमन्त्री गौतमले भने, “सरकारले संविधानमै छोरासरह अंश दिने व्यवस्था गरेको छ, त्यसलाई व्यवहारमा नै लागु गर्नका लागि पहल पनि भइरहेको छ।” सो अवसरमा उनले नेपाली बालिकाको सुरक्षा, संरक्षण र सशक्तीकरण अभियानमा हस्ताक्षरसमेत गरे।
राष्ट्रिय योजना आयोगका सदस्य डा विजया राईले सरकारले बजेटमा पनि बालिकालाई प्राथमिकतामा राखेर स्कुल, कलेजमा बालिकामैत्री शौचालय निर्माण गर्नुपर्छ भने। महिला, बालबालिका तथा समाजकल्याण मन्त्रालयका सहसचिव राधिका अर्यालले बालिका सुरक्षाका लागि सरकारले विद्यालयस्तरदेखि नै बालिकामैत्री वातावरण सिर्जना गर्न विभिन्न कार्यक्रम गरिरहेको बताए।
सिविन–नेपालका कार्यक्रम संयोजक रश्मिला शाक्यले सरकारले लैङि्गकमैत्री संविधान र बालिकामैत्री वातावरण बनाउनका लागि ध्यान दिनुपर्नेमा जोड दिइन।
सो अवसरमा सम्पूर्ण नेपाली बालिकाका तर्फबाट अनिता विकले नेपालमा बालिकाहरू बलात्कारलगायत विभिन्न खालका हिंसाको सिकार भइरहेको हुनाले तिनलाई न्याय दिनुपर्ने माग गरिन्।
कार्यक्रममा 'किन कि म छोरी हुँ' नामक प्रतिवेदन सार्वजनिक गरिएको थियो। प्रतिवेदनका अनुसार नेपालमा १४ वर्षमुनिका ४८ लाख बालिका छन्। नेपाल बालविवाह हुने राष्ट्रमध्ये विश्वको १० औँ स्थानमा पर्छ।
विश्वभरि नै महिला हिंसा बढ्दै गएपछि त्यसलाई न्यूनीकरण गर्न बालिकाको उमेरदेखि नै सुरक्षा गर्ने उद्देश्यका साथ सन् २०१२ मा संयुक्त राष्ट्र सङ्घको पहलमा सो दिवस मनाउन लागिएको हो। हरेक वर्ष विश्वभरि नै अक्टोबर ११ तारिखका दिन सो दिवस मनाउने गरिन्छ। नेपालमा 'बालिकाहरू सशक्त बनाऔँ बालिकामाथि हुने हिंसा अन्त्य गरौँ' भन्ने नाराका साथ विभिन्न कार्यक्रम गरी उक्त दिवस मनाइँदैछ। रासस
