राष्ट्रपति रामवरण यादवले सविधान सभामा प्रतिनिधित्व गर्ने दलहरुले यसपटक समयसीमाभित्र संविधान जारी गर्ने विश्वास व्यक्त गरेका छन्। उनले यसपटक संविधान प्राप्त गर्ने सवालमा मुलक र देशवासीलाई निराश पारिने छैन।
बडा दशैं तथा विजयादशमीको अवसरमा देश तथा विदेशमा रहनुहुने सम्पूर्ण नेपाली दिदीबहिनी तथा दाजुभाइहरूमा सुख, शान्ति र समृद्धिको लागि मगंलमय शुभकामना व्यक्त गर्दै राष्ट्रपतिले भनेका छन्,'नेपाली जनताले अपार उत्साह प्रदर्शन गरी चयन गरेको दोस्रो संविधान सभाले निश्चित अवधि किटान गरेर संविधानको मस्यौदा तयार पार्न दर्शाएको क्रियाशीलताले हामी सबैलाई आशावादी तुल्याएको छ।'
संविधान सभाको संवन्धित सिमितिले विवादित विषयमा सहमति कायम गर्ने म्याद गुजारेको दिन (मंगलवार) अाएको शुभकामनामा सन्देशमा अाशा व्यक्त गरेको भाषामा दलहरुलाई सचेत गराइएको छ। माघ ८ भित्रै संविधान ल्याउन 'भद्र चेतावनी' दिइएको छ।
'आफूले जनता सामू गरेको कबूल पूरा गर्न संविधान सभामा प्रतिनिधित्व गर्ने दलहरू यस पटक चुक्ने छैनन र तोकिएको मितिमै संविधान निर्माण गर्न सक्षम हुनेछन् भन्ने सबैको आशा रहेको छ । मलाई विश्वास छ, संविधान प्राप्त गर्ने सवालमा यस पटक मुलुक र देशवासीलाई निराश पारिने छैन,' सन्देशमा भनिएको छ।
राष्ट्रपतिले बडा दशैंको अवसरमा प्राकृतिक प्रकोप पीडितलाई पनि सम्झिएका छन्। सन्देशमा भनिएको छ, 'देशका विभिन्न भागमा हालै आएको बाढी, पहिरो र अन्य प्रकृतिजन्य प्रकोपका कारण जीवनयापन कष्टमय भएका परिवारप्रति हार्दिक सहभाव व्यक्त गर्दै उनीहरुको दैनिक गुजारा सहज तुल्याउने तथा बसोबास र जीविकाको व्यवस्था गर्ने कार्यलाई उच्च प्राथमिकतामा राख्न म सबैसंग आग्रह गर्दछु ।'
एकपछि अर्को गर्दै वर्षैभरी आइरहने चाडपर्व र जात्राहरूलाई राष्ट्रपतिले नेपाली संस्कृतिका मौलिक विशेषता ठानेका छन्। 'यिनले व्यक्ति, परिवार, समाज र राष्ट्रलाई आपसमा जोड्न सम्बन्ध–सूत्रको काम गरेका छन् । एक अर्को समुदायका चाडपर्वहरू मिलेर मनाउनु नेपाली समाजको विशिष्ट चरित्र रही आएको छ । सांस्कृतिक सद्भाव, सहयोग र सहयात्राको यस्तो सुन्दर परम्पराप्रति हामी सबैले गर्व गर्नु पर्दछ,' सन्देशमा छ।