त्रिभुवन अन्तर्राष्ट्रिय विमानस्थललाई विदेशीको जासुसी अखडा हुनबाट रोक्दा आफूलाई मन्त्रीबाट हटाइएको नेकपा एमाले सचिव तथा पूर्व पर्यटनमन्त्री भीम आचार्यले बताएका छन्।
मंगलबार सुनसरीको मधेशामा आयोजित विजयादशमीको शुभकामना आदानप्रदान कार्यक्रममा बोल्दै आचार्यले त्रिभुवन अन्तर्राष्ट्रिय विमानस्थलको निर्माण र जिम्मेवारी विदेशीलाई दिन पार्टीका पूर्व अध्यक्ष झलनाथ खनालले बारम्बार दबाब दिएको र नमानेका कारण आफूलाई हटाइएको दावी गरे।
अचार्यले विमानस्थललाई विदेशी तथा निजी क्षेत्रले व्यवस्थापनको जिम्मा लिएमा विभिन्न जासुसी उपकरणहरु राखेर विमानस्थलबाटै सुराकी गर्ने दावी गरे। उनले आफ्नो स्वार्थ पुरा गर्नका लागि खनालले दबाब दिँदा नमानेपछि आफूलाई हटाइ आफ्नै स्वकीय सचिवलाई पयर्टन मन्त्री बनाएको बताएका छन्। उनले खनालले आफ्नो व्यक्तिगत इवी साँध्न आफूलाई हटाएको बताए।
आचार्यले विभिन्न मुलुकबाट विमानस्थलको व्यवस्थापन र निर्माणका लागि पटक पटक प्रस्ताव आएपनि राष्ट्र हित र स्वार्थका लागि आफूले वेवास्ता गरेको दावी गरे। उनले कोरिया, जर्मन, जापान, फ्रान्स लगायतका मुलुकबाट प्रस्ताव आएको बताए। सो विषयमा नागरिक उड्यन प्राधिकरणलाई परामर्श गर्दा विदेशीलाई दिन नहुने राय आएकोले नेपाल सरकार आफैले गर्ने अडानका कारण पूर्व अध्यक्ष खनानले मन्त्री पदबाट हटाएको तर्क गरे।
उनले नेपालको आकाश अरुले कब्जा गरेर वार्षिक ८५ अर्ब रुपैया आम्दानी गरिरहेको समेत बताए। विमानस्थल व्यवस्थापनको जिम्मा नेपाल वा भारतपक्ष जोसुकैलाई दिएपनि दुरुपयोग हुने र एउटालाई दिँदा अर्को रिसाउने भएकोले पनि दिन नहुने उनले बताए।
आफूले ५ वर्षभित्र २० वटा विमान ल्याउने गरी योजना बनाएपनि पार्टी नेताकै दबाब र स्वार्थका कारण हटाइएको गुनासो गरे। सो विषयमा कुरा उठ्ने र भाँडभैलो हुने डरले पार्टी केन्द्रिय कमिटिको बैठक समेत सारेको सार्यै गरेको आरोप लगाए।
नेकपा एमाले मधेशा गाउँ कमिटि र युवा संघ नेपाल मधेशाको आयोजनामा भएको शुभकामना अदानप्रदान कार्यक्रममा एमाले सुनसरी अध्यक्ष द्वारिकलाल चौधरी, सदस्य शम्भु अचार्य, गाउँ अध्यक्ष कोषराज अधिकारी, कैलाश कार्कीलगायतले बोलेका थिए।
