नेपाली काँग्रेसका सहमहामन्त्री पूर्णबहादुर खड्काले नेपाल प्रेस युनियन काठमाडौँ शाखालाई रु एक लाख सहयोग गर्ने घोषणा गरेकाा छन्।
प्रेस युनियन काठमाडौँद्वारा शनिबार राजधानीमा आयोजित सम्मान एवम् शुभकामना आदानप्रदान कार्यक्रममा उनले नेपाल पत्रकार महासङ्घका संस्थापक अध्यक्ष एवम् पूर्व प्रधानमन्त्री कृष्णप्रसाद भट्टराईको स्मृतिमा अक्षयकोष स्थापना गर्न आर्थिक सहयोग गरेको बताए।
सो अवसरमा नेपाली काँग्रेसका केन्द्रीय सदस्य एवम् सभासद् नवीन्द्रराज जोशीले सरकारका कामलाई जवाफदेही बनाउन र संविधान लेखनमा खबरदारी गर्न प्रेसले महत्वपूर्ण भूमिका निर्वाह गर्नुपर्ने बताएका थिए।
प्रेस युनियन काठमाडौँ शाखाका अध्यक्ष नकुल अर्यालले दसैँ आइसक्दा पनि अधिकांश सञ्चार प्रतिष्ठानमा पत्रकारले तलब नपाएको भन्दै तत्काल उपलब्ध गराउन माग गरेका थिए।
कार्यक्रममा प्रेस युनियनको आठौं महाधिवेशनबाट निर्वाचित केन्द्रीय पदाधिकारी एवम् सदस्यलाई सम्मान गरिएको थियो।
सो अवसरमा कार्यालय तथा कार्यक्रम सञ्चालनका लागि पत्रकार भक्तबहादुर थापाले रु १५ हजार, बसन्तप्रकाश उपाध्यायले रु १० हजार तथा काँग्रेस प्रचार विभागका सदस्यसचिव दामोदरप्रसाद दवाडीले रु पाँच हजार ५सय ५५ सहयोग गर्ने प्रतिबद्धता व्यक्त गरेका छन्।