विशेष अदालत काठमाडौले तराई टुक्र्याउने योजनासहित अभियान चलाइरहेका बेला पक्राउ परेका डा. सीके राउतलाई थप दुई दिन हिरासतमा राख्न अनुमति दिएको छ।
विशेष अदालतका न्यायाधीशहरु मोहनरमण भट्टराई र भूपेन्द्रप्रसाद राईको इजलासले आइतबार सर्वोच्च अदालतमा उपस्थित गराउनुपर्ने देखिएकाले दुई दिन थुनामा राख्न आदेश दिएको विशेषका रजिस्ट्रार नातिबाबु लामिछानेले बताए।
सर्वोच्चले शुक्रबार सशरीर उपस्थित गराउन आदेश दिएपछि मोरङ प्रहरी निरीक्षकसहितको टोलीले राउतलाई बुधबार बिहान विराटनगरबाट काठमाडौं ल्याएको थियो।
उनलाई सर्वोच्चमा पेस गरिए पनि मुद्दाको पालो नआएपछि पेसी सरेको हो। यसअघि पनि प्रहरीले राउतलाई विशेष अदालत पेस गरेको थियो।
डा. राउतविरूद्व राज्यद्रोहमुद्दाको तयारी भइसकेको छ। 'राष्ट्र विखण्डन गर्ने अभियानमा हिँडेका डा. राउतविरूद्व लामो छलफलपछि राज्यद्रोह मुद्दा लगाउने सरकारले तयारी गरेको थियो,' गृहका एक उच्च अधिकारीले सेतोपाटीलाई भने।
मुलुकी ऐनको राज्यविप्लव तथा राज्यद्रोह महलअनुसार राष्ट्र विखण्डनको गतिविधि गरेको पुष्टि भए जन्मकैदसम्मको सजाय हुने व्यवस्था छ।
राज्यद्रोह र राज्यविप्लव सम्बन्धी मुद्दा विशेष अदालतले मात्र हेर्छ।
