स्कटल्याण्डका बहुमत जनता संयुक्त अधिराज्यमै रहने पक्षमा उभिएका छन्। अहिलेसम्मको मतपरिणाम अनुसार लगभग पचपन्न प्रतिशत स्कटिसले स्वतन्त्रतालाई अस्वीकार गरेका छन्। बिबिसीका अनुसार ३२ वटा स्थानीय निकायमध्ये २९ वटाको मतपरिणाम प्राप्त भएको छ।
स्वतन्त्रता हुँदैन भन्ने पक्षले ५५ प्रतिशत मत पाएको छ र हुन्छ भन्ने पक्षले ४५ प्रतिशतमा चित्त बुझाउनुपर्ने देखिएको छ। बिबिसीले अहिलेसम्मको परिणामका आधारमा स्वतन्त्र राज्य बन्नुहुन्न भन्ने पक्षले जितेको अनुमान गरेको छ।
अहिलेसम्मको गणना अनुसार स्वतन्त्रता हुँदैन भन्ने पक्षमा १७ लाख ३७ हजार मत परेको छ। स्कटल्याण्डलाई अलग्गै देश बनाउनुपर्छ भन्ने पक्षमा जम्मा १३ लाख ९८ हजार मत खसेको छ। बाँकी रहेको तीन स्थानीय निकायको गणनाले यही लय पक्रिने अनुमान संचारमाध्यमहरुले व्यक्त गरेका छन्।
सबभन्दा ठूलो शहर ग्लास्गोले स्वतन्त्रताको पक्षमा मत दिए पनि अधिकांश ठाउँमा स्कटल्यान्डवादीहरु हारेका छन्। स्कटिस नेशनल पार्टीकी उपनेता निकोला स्टर्जीनले झिनो मततान्तरले पछि पर्नुपर्दा आफूलाई गम्भिर निराशा भएको बताएकी छन्।
सबै दलका सांसदहरुले परिणाम जे बताए पनि जनमतसंग्रहको गम्भीर असरहरु पर्नेछ। एडिनबरालाई थप स्वायत्तता दिइँदा ब्रिटेनका अरु राज्यमा पनि त्यस्तै अधिकारको माग हुन थालिसकेको छ।
