नेपाली कांग्रेसका केन्द्रीय सदस्य शेखर कोइरालाले पार्टी पदाधिकारीहरुको अहमताका कारण पार्टी र मुलुक समस्यामा परेको दाबी गरेका छन्।
प्रमुख प्रतिपक्षी दल एमाओवादी लगायत मधेशवादी दलहरुले विभिन्न माग राख्दै संसदको अवरोध गरीरहेको बेला सेतोपाटीसँग कुरा गर्दै कोइरालाले पार्टी सभापति कोइरालासहित पदाधिकारीहरुको हालीमुहालीका कारण यस्तो संकट पैदा भएको बताए।
'खासगरी दोस्रो संविधानसभाको निर्वाचन पश्चात नेतृत्वले अरु केन्द्रीय समितिका सदस्यहरुको राय बुझ्ने प्रयास गर्नुको सट्टा हामीले गरेपछि जे पनि हुन्छ भन्ने मानसिकताबाट चल्दा अहिलेको समस्या पैदा भएको हो,' उनले भने।
मंसिर ४ गते सम्पन्न संविधानसभाको निर्वाचनमा पराजय बेहोरेका एमाओवादी लगायत मधेशवादी दलहरुसँग चार बुँदे सहमति गर्दादेखि दोस्रो ठूलो दल एमालेसँग भएको ७ बुँदे सहमतिको दिर्घकालिन असरको आकलन नगरी सहमति गरेर ठूलो राजनीतिक गल्ति गरेको पनि उनले दाबी गरे।
अहिले एमाओवादीले त्यहि चार बुँदे सहमतिको कार्यान्वयनका नाममा उच्चस्तरीय राजनीतिक संयन्त्रको गठन र एमालेले बेलाबखतमा राष्ट्रपतिको अनुमोदनको विषय उठाइरहेका छन्, उनले थप्दै भने, यसले नै नेतृत्वको अदूरदर्शिताकेा पुष्ट्याइ गरेको छ।
एमाओवादी अध्यक्ष पुष्पकमल दाहालले चार बुँदे देखाउदै उच्चस्तरीय राजनीतिक संयन्त्रको माग गर्नुको कारण उल्लेख गर्दै कोइरालाले भने,'प्रचण्डले संयन्त्रको गठन र त्यसको नेतृत्व आफूले खोज्नुका पछाडि मुख्य तीन कारणः राज्यसत्तामा हालीमुहाली गर्न, संविधानका अर्न्तवस्तुमा दलहरुबीच सहमति कायम गर्न र शान्ति प्रक्रियाका बाँकी कार्य सम्पन्न गर्ने उद्देश्यल रहेको छ।'
एमाओवादी अध्यक्ष प्रचण्डले यसअघि पूर्वप्रधानन्यायाधीश खिलराज रेग्मीको नेतृत्वमा रहेको गैरदलीय सरकारका पालामा जस्तै राज्यसत्तामा हाली मुहाली गर्न संयन्त्रको नेतृत्व खोज्नु गलत भएको बताए।
'त्यतिबेला पो गैरराजनीतिक सरकार थियो र त्यसलाई बाटो देखाउने नाममा संयन्त्रको जरुरी भयो होला तर अहिले त जनताबाट निर्वाचित राजनीतिक दलहरुको सहमतिमा दुइतिहाइ बहुमत सहितको सरकारमा सभापति सुशील दा हुनुहुन्छ भने उहाँ संयन्त्रको नियन्त्रणमा किन बस्ने?' उनले प्रश्न गरे।
प्रचण्डले संविधानसभाको पहिलो बैठकमा व्यक्त गरेको अभिव्यक्ति स्मरण गर्दै कोइरालाले भने, 'त्यतिबेला पनि प्रचण्डले सर्वदलीय राष्टिय सरकार बनाउन सहमत भएका भए पनि सरकारमा सहभागी भएपछि प्रमुख प्रतिपक्षमा राप्रपा नेपाल आउने हुँदा त्यसको अस्थित्व नस्वीकार्न सरकारमा सहभागी नभएको हो।'
त्यसैगरी संयन्त्र गठनको मागको दोस्रो कारण उल्लेख गर्दै कोइरालाले भने, नेताहरुले संविधानसभा निर्वाचन पश्चात विनासोच विचार संबैधानिक राजनीतिक संवाद तथा सहमति समितिको सभापतिमा एमाओवादी नेता बाबुराम भट्टराइलाई बनाए। तर अहिले राजनीतिक संयन्त्रको नेतृत्व प्रचण्डलाई दियो भने भट्टराईसँगको अर्न्तद्धन्द्ध बढ्ने दाबी गरे। साथै उनले संयन्त्रको प्रमुख प्रचण्डबनेपछि उनी संविधानसभाभित्र र बाहिर सहमति निर्माण गरी संविधान निर्माण गर्न भन्दा पनि संविधानसभा बाहिर रहेको मोहन बैद्य नेतृत्वको माओवादीसँग हिमचिम बढाएर संविधान बनाउने कार्यमा गतिरोध पैदा हुने आशंका व्यक्त गरे।
'हामीले फेरिपनि राजीतिक दलहरुबीच सहमतिकै माध्यमबाट निर्धारित समयभित्र संविधान बनाउनु पर्छ तर त्यो सहमति संवाद समितिलाई अन्डरमाइन्ड गर्ने प्रयासबाट होइन,' उनले भने।
एमाओवादीले राखेको संयन्त्र गठनको मागलाई समर्थन गर्दै आएका मधेशवादी दलहरुप्रति लक्षित गर्दै कोइरालाले भने, अहिले पनि मधेशवादी दलहरु प्रचण्डको पुच्छर बन्दा भोलि नोक्सान हुन्छ भन्ने देखेर पनि त्यसलाई बुझ्न सकिरहेका छैनन्। उनले मधेसी जनता एन्टी कम्युनिष्ट विचारका भएको भन्दै एमाओवादीको पछि लाग्दै मधेशवादी दललाई नै घाटा हुने ठोकुवा उनले गरे।
सरकारमा रहेका कांग्रेस र एमालेको नेतृत्वले अहिलेपनि एमाओवादी नेतासँग तीन दलको बैठक बस्ने गरेकोमा बरु त्यसमा मधेशवादी दलहरुलाई पनि समावेश गराउन सुझाव दिए।
संसदको गतिरोध हटाउन सत्तागठबन्धनले एमाओवादीको माग अनुसार उच्चस्तरीय राजनीतिक संयन्त्र गठनको संभावनाबारे गरेको प्रश्नको जवाफमा कोइरालाले त्यो यथार्थमा आवश्यक नभएको दाबी गरे। 'यदि संयन्त्रको गठन गर्ने नै हो भने त्यसको क्षेत्राधिकार शान्ति प्रक्रियाका बाँकी कार्य सम्पन्न गर्ने विषयमा मात्रै सिमित गरिनु पर्छ, सरकार सञ्चालन र संविधान निमार्णका विषयमा हुनु हुदैन,' उनले भने।