पूर्वप्रधानन्यायाधीशले बहालवाला न्यायाधीशहरुलाई ‘ऐरे गैरे नत्थु खैरे’ भनेको र कान्तिपुर दैनिकले त्यही छापेर अदालतको अवहेलना गरेको अदालतको अवहेलना सम्बन्धी मुद्दाको बहसका क्रममा वकिलहरुले बताएका छन्।
सर्वोच्च अदालतमा सुनुवाइ भइरहेको कान्तिपुरविरुद्धको अवहेलना मुद्दा पक्षबाट बिहिबार बहस गरेका सबै वकिलले तीन महिनाअघि कान्तिपुरमा प्रकाशित पूर्वप्रधान्यायाधीश मीनबहादुर रायमाझीको उक्त भनाइ आपत्तिजनक रहेको जिकिर गरेका हुन्।
न्यायाधीशद्वय गोपाल पराजुली र चोलेन्द्रशमशेर राणाको इजलासमा बिहीबार बहस भएको हो। यी दुवै न्यायाधीशले ३५ किलो सुन तस्करीको मुद्दाका अभियुक्तलाई धरौटीमा छोडेको भन्ने कान्तिपुरमा प्रकाशित समाचारलाई लिएर अवहेलना मुद्दा परेको थियो। सुनुवाइका क्रममा अदालतमा कान्तिपुरका प्रकाशक कैलाश सिरोहिया, प्रधानसम्पादक सुधीर शर्मा, निर्देशक स्वस्तिका सिरोहिया र संवाददाता घनश्याम खड्का उपस्थित थिए।
विहीबारको बहसमा वकिलहरुले न्याय परिषदले सर्वोच्चका लागि न्यायाधीश सिफारिस गरेपछि कान्तिपुरमा छापिएका प्रतिक्रिया र लेखहरुबारे आपत्ति जनाएका थिए।
बहसका क्रममा वरिष्ठ अधिवक्ता किशोर अधिकारीले तत्कालीन मुख्य न्यायाधीशहरुलाई पूर्वप्रधानन्यायाधीशले ‘ऐरे गैरे नत्थु खैरे’ भन्नुले न्यायाधीश र अदालतकै मर्यादामा ठाडो आँच पुर्याएको जिकिर गरेका छन्।
न्याय परिषदले सर्वोच्च अदालतका लागि पुनरावेदनका तत्कालीन मुख्य न्यायाधीशहरुलाई सिफारिस गरेपछि पूर्वप्रधानन्यायाधीशले दिएको उक्त प्रतिक्रिया कान्तिपुरले छापेको थियो।
अर्का अधिवक्ता गोपालकृष्ण घिमिरेले बहस गर्दै राज्यको अरु अंगलाई जस्तो अदालतलाई आलोचना गर्न नपाइने बताए।
उनले भने ‘पूर्वप्रधानन्यायाधीश जस्तो मान्छेले न्यायाधीशलाई ‘नत्थु खैरे’ भन्न पाइन्न त्यस्तो कुरा छाप्न पनि पाइन्न।’
लगातार अदालतबारे नकारात्कमक लेख्नु छाप्नुमा कान्तिपुरको स्वार्थ छ भन्ने देखिएकोसमेत उनले इजलासमा जिकिर गरे।
अर्का अधिवक्ता तारा सापकोटाले अदालतबारे कान्तिपुरमा आएका समाचारलाई 'क्रिमिनल एक्टिभिटी'को संज्ञा दिए।
‘कान्तिपुरले जुन किसिमले अदालतबारे समाचार दिएको छ त्यो क्रिमिनल एक्टिभिटि हो,’ उनले इजलासमा भने।
यी बाहेक अन्य ४ जना वकिलहरुले पनि कान्तिपुरले अदालतको मर्यादा नराखी समाचार र लेखहरु लगातार छापेको आरोप लगाए।
बिहीबार सुनुवाइको समय सकिएपछि शुक्रबार फेरि बहस हुने भएको छ।
