विशेष अदालत काठमाडौले तराई टुक्र्याउने योजनासहित अभियान चलाइरहेका बेला पक्राउ परेका डा. सीके राउतलाई २४ घन्टा हिरासतमा राख्न अनुमति दिएको छ।
मोरङ प्रहरीले राउतलाई बुधबार विहान विराटनगरबाट काठमाडौं ल्याइ विशेष अदालतमा उपस्थित गराएको थियो। प्रहरीले ‘राज्यविरुद्धको अपराध’मा थप अनुसन्धान गर्न राउतलाई २५ दिन थुनामा राख्न अनुमति मागेको थियो। यसपछि
विशेष अदालतका न्यायाधीश मोहनरमण भट्टराई र भुपेन्द्र राईको इजलासले २४ घन्टा मात्र थुनामा राख्न आदेश दिएको हो।
सरकारले तराई टुक्र्याउने योजनासहित अभियान चलाइरहेका बेला पक्राउ परेका डा. सीके राउतलाई राज्यद्रोहमुद्दासहित सिधै विशेष अदालत लगिएको हो।
डा. राउतलाई साढे ११ बजे विमानमार्फत काठमाडौं ल्याइएको थियो। बन्दी प्रत्यक्षीकरणको रिटमा सर्वोच्च अदालतले आज राउतलाई अदालत उपस्थित गराउन सरकारलाई आदेश दिएको थियो।
डा. राउतविरूद्व राज्यद्रोहमुद्दाको तयारी भइसकेको छ। 'राष्ट्र विखण्डन गर्ने अभियानमा हिँडेका डा. राउतविरूद्व लामो छलफलपछि राज्यद्रोह मुद्दा लगाउने सरकारले तयारी गरेको थियो,' गृहका एक उच्च अधिकारीले सेतोपाटीलाई भने, 'उनलाई सिधै विशेष अदालत लगिँदैछ।'
मुलुकी ऐनको राज्यविप्लव तथा राज्यद्रोह महलअनुसार राष्ट्र विखण्डनको गतिविधि गरेको पुष्टि भए जन्मकैदसम्मको सजाय हुने व्यवस्था छ।
राज्यद्रोह र राज्यविप्लव सम्बन्धी मुद्दा विशेष अदालतले मात्र हेर्छ।