भारतीय प्रधानमन्त्री नरेन्द्र मोदीले प्रधानमन्त्री सुशील कोइरालाको निमन्त्रणामा साउनको तेस्रो साता नेपालको साउन गरेका थिए।
मोदीको भ्रमणका बारेमा कांग्रेसका केन्द्रीय सदस्यहरुले भने झण्डै डेढ महिनापछि मात्रै औपचारिक जानकारी पाए। त्यो पनि बिना प्रसंग।
पार्टीको विधान अनुसार असोज ४ गतेभित्र सम्पन्न गर्नुपर्ने स्थानीय तहदेखि केन्द्रीय समितिसम्मको अधिवेशन गर्न नसक्ने अवस्थामा सबै निकायको कार्यकाल बढाउने निर्णयका लागि डाकिएको केन्द्रीय समिति बैठकमा सोमबार कोइरालाले मोदी भ्रमणबारे जानकारी दिएका हुन।
पार्टी र सरकारको नेतृत्व गरिरहेका कोइरालासहित केन्द्रीय पदाधिकारीहरुको कार्यशैलीको विरुद्ध केन्द्रीय सदस्यहरुले आपत्ति जनाएपछि उनीहरुले उठाएका प्रश्नहरुको जवाफ दिन समय लिएका कोइरालाले झण्डै आधा घण्टाको समय मोदीकै प्रसंशामा विताएको एक सदस्यले बताए।
झण्डै आठ महिनापछि डाकिएको केन्द्रीय समितिको बैठकमा पार्टी र सरकार सञ्चालन प्रभावकारी हुन नसकेको आरोपको खण्डन वा बचाउ कसरी गर्लान भनि पर्खिएका केन्द्रीय सदस्यहरु कोइरालाको मोदी माहात्म्य सुनेपछि के भन्ने के नभन्ने स्थितिमा पुगेको ती सदस्यले बताए।
कोइरालाले भारतजस्तो मुलुकको प्रधानमन्त्री मोदीले नेपालको आर्थिक विकासका लागि उर्जा व्यापार सझौतासँगै उर्जा विकास सम्झौताको प्रस्ताव राखेको, दुई ठूला छिमेकी देश भारत र चीनको आर्थिक विकासबाट नेपालले आर्थिक लाभ लिन सक्नुपर्ने भनाइ राखेका थिए। त्यसैगरी कोइरालाले आफूलाई विभिन्न देशका नेपालस्थित राजदूतहरुले भेटेर समयमै संविधान सुझाएकेा पनि बताए।
पार्टी र सरकारको नेतृत्वको बचाउ गर्दै कोइरालाले आफ्नो प्रतिकूल स्वास्थ्यका बाबजूद सबैलाई मिलाएर अगाडि बढाउन दृढ भएको दावी गर्दै निधारित मितिभित्रै देश र जनतालाई नयाँ संविधान दिनु पर्ने धारणा राखेका थिए।
बैठकमा पार्टीको कार्यकाल एक वर्षका लागि थप्न राखेको प्रस्तावमाथिको छलफलमा भाग लिँदै अधिकांश सदस्यहरुले नेतृत्वले विधान अनुसार पार्टी संगठन र सरकार नचलाउदा सिंगो केन्द्रीय निकाय र पार्टी संगठनलाई नै आधात पुगेको भनाइ राखेका थिए।
केन्द्रीय सदस्य शंकर भण्डारीले कार्यकाल थप्ने प्रस्तावको विरोध गर्दै विधान अनुसार गर्नु पर्ने महाधिवेशन गर्न नेताहरु अग्रसर नहुने तर आफ्नै कार्यकाल थप्ने कार्यले सिंगो संस्थाकै इमेज नराम्रो बनाएको बताए।
अहिलेको केन्द्रीय समिति र नेतृत्वले समयमै महाधिवेशन गर्न नसकेको कारण अब यसको कार्यकाल थप गर्नु भन्दा त्यसलाई भंग गरी पार्टी महाधिवेशन तयारी समिति बनाएर जानु पर्ने माग गरेका थिए।
उनको भनाईप्रति सहमति थप्दै अर्का सदस्य बालकृष्ण खाँणले संस्थागत र विधान सम्मत ढंगले पार्टी सञ्चालन गर्न नसक्ने केन्द्रीय नेतृत्वको कार्यकाल थपगरी नेताहरुलाई थप अलोकप्रिय बनाउनुभन्दा सभापति कोइरालाकै संयोजकत्वमा अधिवेशन आयोजक समिति बनाएर महाधिवेशनमा लाग्न सुझाव दिएका थिए।
विगत ८ महिनाको अवधिमा पार्टीको तर्फबाट जेजति निर्णयहरु लिइएको छ त्यसमा विधान अनुसार केन्द्रीय समितिको निर्णय नभई पदाधिकारी र केही नेताहरुको एकलौटी निर्णय अलोकतान्त्रिक अभ्यास भएको केन्द्रीय सदस्य अर्जुन नरसिंह केसीले बताए।
आइतबार साँझमात्रै सभापति कोइरालाले १२ जना पार्टी सदस्यलाई केन्द्रीय सदस्य र आमन्त्रीत सदस्यका रुपमा मनोनित गरेकोमा ढिलै भएपनि युवा र जुझारु पूर्व विद्यार्थी नेताहरुलाई ल्याएको भन्दै त्यसमा पूर्व विद्यार्थी नेता विश्वप्रकाश शर्मा, महादेव गरुङ, ट्रेड यूनियन कांग्रेसका पूर्व अध्यक्ष लक्ष्मण बस्नेत लगायत विभिन्न क्षेत्र र समुदायको प्रतिनिधित्व हुन नसकेकोमा सभापतिको ध्यानाकर्षण गराएका थिए।
सोमबारकेा बैठकमा कतिपय राजधानी बाहिर रहेका केन्द्रीय सदस्यसँगै वरिष्ठ नेता शेरबहादुर देउवा अनुपस्थित रहेका थिए।
