एआइजी बढुवामा चौतर्फी आलोचना खेपेको सरकारले डिआइजी बढुवा सिफारीसमा भने सुधार गरेको छ। प्रहरी प्रशासनका जानकारहरुका अनुसार आइतबार भएको १३ डिआइजी सिफारीस डिआइजीको तुलनामा कम विवादास्पद् छ।
स्रोतका अनुसार यो सिफारीसमा गृह मन्त्रालयभन्दा प्रहरी प्रधान कार्यालय हाबी भएको छ। गृह सचिव सूर्य सिलवाल, आइजिपी उपेन्द्रकान्त अर्याल लगायत रहेको बढुवा समितिले आइतबार १३ जानाको सिफारीस गरेको थियो।
बढुवा समितिले आइजीपी अर्यालकै ब्याचका एसएसपीहरु रामकुमार खनाल, मनोहर रिमाल र पूर्णसिंह खड्कालाई पनि डिआइजीका लागि सिफारिस गरेको छ। उनकै ब्याचका रवीप्रताप राणा र ज्ञानोदराज वैद्य भने अझै परेनन्।
बाँकी सिफारिसमा २०४४ चैतमा प्रहरीमा प्रवेश गरेका छन्। सिफारिसमा पर्नेमा पशुपति उपाध्याय, देवेन्द्र सुवेदी, विजयलाल कायस्थ, मधु पुडासैनी, माधव जोशी, केशरीराज घिमिरे, कमल्ासिंह बम, मिङमार लामा, पंकज श्रेष्ठ र माधव कुमार नेपाल रहेका छन्।
त्यो व्याचबाट अहिलेका प्रत्यासीमध्ये एसएसपीमा एक नम्बरमा रहेका रणबहादुर चन्द र दुई नम्बरका हेमन्त पाललाई छुटाएको छ।
उनीहरुलाई पन्छाएर बार्हौं नम्बरका मधु पुडासैनी, एघारौं नम्बरमा रहेका कमलसिंह बमलाई ल्याइएको छ।
सिफारीसमा परेका कतिपय एसएसपी भन्दा रोमेन्द्रसिंह देउजा, सुदीप आचार्य र गोविन्द निरौला 'राम्रा अफिसर' भएको दाबी एक पूर्व आइजिपीले गरे।
आइजिपी अर्याल व्याचका खनाल, रिमाल र खड्का डिआइजी सिफारिसमा परेकोमा उनले आश्चर्य व्यक्त गरे। 'पटकपटक कारबाही परेर रिजेक्ट भएका उनीहरुलाई बढुवामा गर्नु जरुरी थिएन,' उनले भने।
सिफारिसमा केहि मात्रामा काखापाखा भएको तर्क पूर्व गृहसचिवले गरे। कूल सय पूर्णाङ्कमध्ये कार्यसम्पादन ४०, बढुवा समिति ७.५ र विशेष जिम्मेवारीको ५ अंक मूल्यांकनकर्ताले विवेकपूर्ण तरिकाले दिने हो भने राम्रा प्रहरीको बाहेक अरुको बढुवा सम्भव छैन।
बढुवाका लागि गरिएको सिफारिस उपर चित्त नबुझेकाले ७ दिन भित्र उजुरी दिन पाउने प्रावधान छ। लोकसेवा आयोगका अध्यक्ष प्रमुख रहने उजुरी सुन्ने समितिमा मुख्य सचिव र कानुन सचिव सदस्य रहन्छन।
समितिले अन्तिम सिफारिस गरेपछि गृहमन्त्री स्तरीय निर्णयबाट बढुवा कार्यान्वयन हुने प्रहरी नियमावलीमा उल्लेख छ।
प्रहरी नियमावली अनुसार बढुवामा आइजिपी सबैभन्दा 'पावरफूल' छन्। त्यसपछि गृहसचिवको हात 'दह्रो' हुन्छ। उनीहरुले आफ्नो अधिकार प्रयोग गरे भने गृहमन्त्रीले चाहँदैमा कसैलाई 'टिप्न' वा 'फ्याँक्न' सम्भव छैन।
