नेकपा एमालेका अध्यक्ष केपी ओली शुक्रबार बेलुकादेखि दिल्लीमा छन्। बाहिर देख्दा उनी विशुद्ध स्वास्थ्य 'चेक-अप' गराउन दिल्ली गएका हुन्। भित्री उद्देश्य भने स्वस्थ्य चेक-अप भन्दा पनि महत्वपूर्ण रहेको एमाले उच्च स्रोतले सेतोपाटीलाई बतायो।
स्रोतका अनुसार ओली जम्मा ६ दिन दिल्ली बस्ने छन्। ६ दिनमध्ये आफ्नो स्वास्थ्य परीक्षणमा दुई दिन मात्र बिताउनेछन्। बाँकी ४ दिन उनले 'महत्वपूर्ण' राजनीतिक भेटघाटमा बिताउने छन्।
उनको भेटघाटको लामै लिस्ट रहेको उनी निकट स्रोतले बतायो। तर, को कोसँग भेट्ने भन्ने नाम खुलाउन भने चाहेन। दिल्लीमा ओलीको राजनीतिक तथा 'एजेन्सी' को तहमा राम्रो सम्बन्ध छ।
उनी नेपालमा संविधान बनाउने अन्तिम रस्साकसी चलिरहँदा दिल्ली पुगेका हुन्।
दिल्ली जानुअघि उनले आफ्नै निवासमा एनेकपा माओवादी अध्यक्ष पुष्पकमल दाहाल र नेपाली कांग्रेसका नेता कृष्णप्रसाद सिटौला लगायतसँग भेटवार्ता गरेका थिए।
संविधानसभा कार्यतालिका अनुसार सहमति जुटाउने म्याद चार दिन मात्रै बाँकी रहँदा पनि पार्टीहरुबीच मुख्य विवादित बिषयमा सहमति जुट्न सकेको छैन। यसैबीच उच्चस्तरीय राजनीतिक संयन्त्र निर्माणलाई लिएर पार्टीहरुबीच सहमतिको माहोल बिथोलिएको छ।
संयन्त्र निर्माणको बिपक्षमा उभिएका कांग्रेस-एमाले वार्तामा नबस्ने एमाओवादी धम्कीपछि संयन्त्र निर्माण गर्न सहमत भएका छन्। तर, संयन्त्रको नेतृत्व र संयन्त्रमा कुन कुन पार्टीलाई सहभागी बनाउने भन्नेमा पार्टीहरुबीच नयाँ विवाद देखिएको छ।
एमाओवादी भरसक संयन्त्रको नेतृत्व आफैँ गर्न चाहन्छ। कांग्रेसलाई त्यसमा खासै आपत्ति नभए पनि एमाले भने त्यसो गर्न नसकिने अडानमा कायम छ। एमाले पार्टीभित्रैकै समीकरणका कारण ओलीले प्रचण्डलाई संयन्त्रको नेता मानिहाल्न सकिरहेका छैनन्। 'माधवजीहरुले चर्को बिरोध गरून्जेल ओलीले प्रचण्डलाई संयन्त्रको नेतृत्व दिन कठीन छ,' एक एमाले नेताले सेतोपाटीलाई बताए।
पहिले तीन दलको संयन्त्र बन्ने सहमति भएको भए पनि अहिले आएर एमाओवादीले मधेसवादी पार्टीहरुलाई पनि संयन्त्रमा राख्नुपर्छ भन्ने नयाँ अडान लिएको छ।ऊ मधेसवादी पार्टीलाई एक्लै छोडेर संयन्त्रमा जाने 'मुड' मा छैन किनकि ऊ संविधान लेखनमा जनजाति र मधेसी शक्तिको साथ चाहन्छ।
कांग्रेस-एमालेले चौथो पार्टी राप्रपा-नेपाललाई छोडेर, ससाना मधेसी दललाई कसरी संयन्त्रमा राख्न सकिन्छ भन्ने प्रश्न गरेका छन्। कांग्रेस-एमालेले मधेसी पार्टीहरुलाई मोर्चा बनाएर चौथो ठूलो शक्तिका रुपमा आउन सुझाएका थिए। मधेसी पार्टीहरुले मोर्चाको प्रयत्न गरे पनि अन्तिम समयमा मोर्चा बनाउन सकेनन्।
'प्रचण्ड स्वयम् पनि मधेसी दलको मोर्चा बनोस् भन्ने पक्षमा छैनन्। मधेसी र जनजातिको नेता आफैँ बन्ने उनको ध्याउन्न छ,' एक कांग्रेस नेताले सेतोपाटीसँग भने।
संयन्त्रको विवाद सुल्झिए संविधान निर्माणमा ठूलो असहमति नरहेको ती कांग्रेस नेताको जिकिर छ।
ओलीको भ्रमणको उद्देश्य संबिधान निर्माणका बिषयमा दिल्लीको धारणा बुझ्नु मात्रै होइन। उनी आफ्नै बारे पनि दिल्लीको नाडी छाम्न चाहन्छन् र संबिधान निर्माणपछि सरकार आफ्नो नेतृत्वमा बनाउन दिल्लीको साथ चाहन्छन्।
सुशील कोइरालाले संविधान बनेपछि आफू सरकार छोड्ने धेरै लामो समयदेखि बताउँदै आएका छन्। कांग्रेस र एमालेबीच सरकार बन्ने समयमा भएको सात बुँदे सहमतिमा पनि संविधान बनेपछि एक वर्षभित्र राष्ट्रपति, उपराष्ट्रपति, प्रधानमन्त्री र सभामुखको चुनाव हुने उल्लेख छ।
कांग्रेस नेता शेरबहादुर देउवा र प्रधानमन्त्री कोइरालाबीच अहिले देखिएको 'युद्धबिराम' को मूल चुरो पनि संबिधान बनेपछि कोइरालाले सत्ता छोड्न गरेको सार्बजनिक वाचा नै हो।
संबिधान बन्यो र कोइरालाले सत्ता छोडे भने त्यसपछि प्रधानमन्त्रीको मुख्य दाबेदार देउवा र ओली नै हुन्। ओलीको अहिलेको दिल्ली भ्रमणको उद्देश्य उनको प्रधानमन्त्रीको बन्ने आकांक्षासँग पनि जोडिएको छ।