आइतबार दिउँसो १२ बजे जनकपुर विमानस्थलमा नेता र कर्मचारीले खचाखच भरिएको थियो। गाडी पनि उत्तिकै संख्यामा।
शिक्षा कार्यालयका कर्मचारी र शिक्षकहरुको पनि उपस्थिति बाक्लो नै थियो। शिक्षामन्त्री चित्रलेखा यादब सिरहा आउने कार्यक्रम रहेकोले स्वागतका लागि उनीहरु तछाड मछाड गर्दै थिए। सिरहाका शिक्षा अधिकारी ऊँ बहादुर कटुवाल पनि फूलमालाले स्वागत गर्न व्यक्त देखिन्थे।
दिउँसो १२ बजेर ४० मिनेट जाँदा मन्त्री यादब बुद्ध एयरबाट ल्याण्ड गरिन्। उनी विमानस्थलको भिआइपी कक्षमा नआउँदै नेता तथा कार्यकर्ताहरु सुरक्षाकर्मीलाई समेत धक्का दिदै उक्त कक्षमा पुगिसक्यो। मन्त्री भिआइपी कक्षमा प्रवेश गर्ने वित्तिकै कतिपय नेता, कार्यकर्ता, शिक्षक र अन्य कर्मचारीहरु फोटो खिचाउन व्यस्त भए।
भिआइपी कक्षमा मन्त्री यादबसँग फोटो खिचाउन र फूलको माला पहिर्याएर स्वागत गर्नेहरुको भिड थाम्नै नसक्ने भयो। त्यसपछि मन्त्री आफै बाहिर निस्कन सबैलाई भनिन्।
बाहिर निस्केपछि त झन आपसमा बाँझेर भएपनि फूलमाला लगाउने नेता कार्यकर्ता, शिक्षक र अन्य कर्मचारीहरुको भिड बढ्यो।मन्त्री यादबलाई स्वागत गर्नेमा अधिकांश भ्रष्टाचारका आरोप लागेका प्रधानाध्यापकहरु थिए।
सिरहाको लहानबाट जनकपुर विमानस्थलमा पुगेर मन्त्री यादबलाई स्वागत गर्न करिब ३० भन्दा बढी गाडी रिजर्भ गरिएको थियो। ति मध्ये अधिकांश गाडी शिक्षकले रिजर्भ गरिदिएका थिए।
कतिपय विद्यालयका प्रअहरु आफै गाडी भाडा गरेर जनकपुर पुगेका थिए। मावी पतारीका प्रअ विनोद सिंह पनि बोलेरो गाडी भाडा गरेर मन्त्री यादबलाई स्वागत गर्न पुगेका थिए। प्रअ सिंहलाई कतिमा भाडा गर्नुभाको भनेर सोध्दा बताउन चाहेनन्। प्रअ सिंह मात्र होइन् भ्रष्टाचारका आरोपी दर्जनौं प्रअ विमानस्थल पुगेर फूलमालाले मन्त्री यादबलाई स्वागत गरे।
जुनसुकै मन्त्री भ्रमणमा निस्कँदा अगाडिपछाडि प्रहरीले स्कर्टिङ गर्छन्। पछाडि नभएपनि अगाडि अवश्य नै प्रहरीको स्कर्टिङ हुन्छ। तर, शिक्षामन्त्री यादब जनकपुर विमानस्थलदेखि सिरहासम्म आउँदा प्रहरीको स्कटिङ देखिएन्।
धनुषाको सीमा पार गरेर सिरहाको बडहरामाल पुग्ने वित्तिकै सिरहा प्रहरीले भने स्कर्टिङ गर्यो। मन्त्रीलाई स्वागत गर्न जनकपुर पुगेका एक काँग्रेस नेताले भने, ‘आज पहिलो पटक प्रहरीले मन्त्रीको स्कटिङ नगरेको देखें। खै किन प्रहरीले स्कटिङ गरेनन्। म पनि अचम्ममा परेछु।’
शिक्षा कार्यालयका दुईवटा गाडी मन्त्री यादबलाई स्वागत गर्न जनकपुर पुगेको थियो। मन्त्रालयले जिल्ला शिक्षा कार्यालय सिरहालाई हालै उपलब्ध गराएको बा.१ झ. ६१०२ नम्बरको बोलेरो र अर्का पुरानो गाडी बा. २ झ. १०११ नम्बरको गाडी लिएर शिक्षा अधिकारी कटुवाल जनकपुर पुगे।
शिक्षा अधिकारी आफू पुरानो गाडीमा सिरहा आए भने मन्त्री यादबले नयाँ गाडीमा चढेर गृह जिल्ला सिरहा आइन्। शिक्षा कार्यालयका करिब आधा दर्जन कर्मचारी पनि जनकपुर पुगेका थिए।
मन्त्री यादबले सिरहा आउने वित्तिकै पहिले गोलबजारस्थित कार्यकर्ता रामसगुन यादबको घर पुगिन्। त्यहाँ रामसगुनले फूलमालाले स्वागत गरे भने मन्त्रीको पछाडि पछाडि हिडेका सयौं नेता, कार्यकर्ता, शिक्षक र अन्य कर्मचारीहरुलाई चिसो खुवायो।
त्यसपछि काँग्रेसका जिल्ला सचिव उपेन्द्र यादबले आफ्नो घर जान मन्त्री यादबसँग आग्रह गरे। मन्त्री यादब आग्रह स्वीकार गरेर पुनः सिरहा सदरमुकामतर्फ गाडी फर्काइन् र उपेन्द्र यादबको घर पुगिन्। तर, त्यही काँग्रेस सभापति तथा सभासद सितादेवी यादबको पनि घर भएपनि उनको घरमा मन्त्री यादब पुगिनन्।
मन्त्री यादबलाई स्वागत गर्न ठूलो रकम खर्च गरेर जनकपुर गएको प्रति फेसबुकमा समेत तिब्र आलोचना भएको छ। नेपाल पत्रकार महासंघ सिरहा शाखाका सचिव तथा शिक्षक जिवछ उदासीले आलोचना गर्दै सामाजिक सञ्जाल फेसबुकमा लेखेका छन्, ‘उहाँलाई नेपाल प्रहरीका जवानहरु स्कर्टिङ गरेर त ल्याई हाल्छ नि? फेरि यो समस्या नेपाली काँग्रेसमा माात्रै होइन् अन्य दलको सरकार हुँदा पनि रहि रवैया थियो। आफ्नो नेतालाई रचनात्मक काम गर्न सल्लाह दिनु राम्रो हो तर हदैसम्मको चाकरी गरेर नेताको पनि बदनामी र आफ्नो पनि प्रतिष्ठा कम नगर्दा नै वेस हुने हो कि?’
शिक्षामन्त्री यादबलाई भोलि बिहान गोपाल सेवा समिति लहानले सम्मान गर्ने कार्यक्रम छ। सोही कार्यक्रममा सहभागी बन्न मन्त्री यादब एक दिन अगावै आज सिरहा आएकी हुन्।
