राप्रपा नेपालका अध्यक्ष कमल थापाले एन्फा अध्यक्ष गणेश थापालाई सभासद बनाएपछि अहिले चौतर्फी आलोचना भइरहेको छ । चौतर्फी आलोचन खेप्दै आएका कमल थापाले गणेश थापालाई सभासद बनाउन अत्यन्त कठिन भएको बताएका छन् ।
भाइलाई सभासद बनाएपछि कमल थापाले भनेका कुरा -
संविधानसभामा गणेश थापाको मनोनयनको सिफारिस मेरो निमित्त अत्यन्त कठिन र असहज निर्णय थियो । गणेशको मनोनयन संगै सामाजिक संजाल र संचार माध्यममा प्रतिक्रियाहरुको बाढी नै आयो । अधिकांश नकरात्मक थिए ।
उसको योग्यता र क्षमताका बारेमा भन्दा पनि पार्टी अध्यक्षको भाई र एन्फा सम्बन्धी अनियमितताको छानबिनको प्रसंगले बढि प्रतिक्रिया जन्मायो । त्यो बिलकुल स्वभाविक थियो । कतिपयले मेरो छविमा लाग्न सक्ने दागका वारेमा पनि चिन्ता व्यक्त गर्नु भयो ।
केही क्षुद्र टिप्पणीहरु बाहेक अधिकांश प्रतिक्रियाहरुलाई मैले अत्यन्त सहृदयताका साथ ग्रहण गरेको छु । गणेश मेरो सहोदर भाई हो र उसले नेतृत्व गरेको एन्फा अहिले विवादको घेरामा पनि छ । यि दुवै यथार्थलाई आधार बनाई प्रतिक्रियाहरु आउनु स्वभाविक हो ।
ति सबै प्रतिक्रियाहरु बारे अहिले नै म सवाल जवाफ गर्न चाहन्न । समय बलवान छ र समयले सबै आरोप प्रत्यारोपको छिनोफानो गर्नेछ ।
प्रधानमन्त्रि सुशील कोईरालाले स्पष्ट शब्दमा संविधानसभाको गत निर्वाचनमा प्रत्यक्ष र समानुपातिक उमेदवार भएका बाहेक र राष्ट्रिय जीवनमा ख्याति प्राप्त गरेको व्यक्तिहरु मध्यबाट नाम सिफारिस गर्न आग्रह गरेको अवस्थामा हाम्रो अगाडि छनौटको सिमा र बाध्यताका रेखाहरु कोरिएका थिए ।
पार्टीको केन्द्रिय कार्य समितिको बैठकमा बहुसंख्यक गणेशको पक्षमा रहेको भएता पनि म अनिर्णित र किं कर्तव्य बिमुढको अवस्थामा थिए । मन र मस्तिष्कका बिचमा अन्तरद्वन्द निकै समय कायम रह्यो । मेरो अगाडि स्पष्ट रुपमा दुई वटा बाटोहरु थिए ।
एउटा सहज र सरल बाटो, अर्को कठिन र असहज बाटो । संधै झै र शायद स्वभाववश समेत मैले यस पटक पनि अप्ठेरो बाटो नै रोझें । मन र मस्तिष्कको दन्दमा मनले जित्यो । मैले गणेश थापाको नाम सिफरिस गरें। मैले यो निर्णयलाई समयको कसिमा छोडि दिएको छु । खेलजगतको हस्तिको रुपमा पहिचान बनाएका गणेश थापाको मनोनयन राष्ट्रको बृहत्तर हितमा उपयोगि हुनेछ भन्नेमा म बिश्वस्त छु । राप्रपा नेपालको निमित्त गणेश थापा महत्वपुर्ण सम्पति हुनेछ भन्नेमा मलाई द्विविधा छैन ।
जहाँसम्म एन्फाको अनियमितताको प्रश्न छ, त्यस वारे म कुनै टिप्पणी गर्न चाहन्न । कानुन भन्दा माथि कोहि छैन । त्यसवारे कानुनले आफ्नो बाटो तय गर्ने नै छ ।
