न्यायपरिषद्ले सिफारीस गरेको पुनरावेदनका सोह्र मुख्य न्यायाधीशमा एक दम्पत्ति पनि परेका छन्। सात नम्बरमा सिफारीस भएका शम्भुबहादुर खड्का र दश नम्बरकी मीरा खड्का श्रीमान श्रीमती हुन्।
परिषद्को मंगलावरको निर्णय अनुसार सिफारीस भएका खड्का दम्पत्ति 'करिअर' न्यायाधीश हुन्। उनीहरु तीन दशकदेखि न्याय सेवामा छन्।
शम्भु हाल पुनरावेदन अदालत धनकुटाका निमित्त मुख्य न्यायाधीश र मीरा वैदेशिक रोजगार न्यायधीकरण प्रमुख थिइन्।
जानकारहरुका अनुसार तीसको दशकमा ल क्याम्पसमा उनीहरुले कानून मात्र पढेनन्। प्रेमको 'कम्बाइन स्टडी' पनि गरे। पछि लगनगाँठो कसे। सरकारी जागिरमा सँगसँगै जस्तै प्रवेश गरेको दम्पत्तिको वृत्तिविकास एकसाथ हुँदै आइरहेको छ।
पढाई लेखाईमा श्रीमतीभन्दा श्रीमान अलि जान्ने मानिन्छन्। न्यायाधीशको रुपमा भने श्रीमती कम विवादास्पद् छिन्।
राजाको शासनकालमा शम्भु भ्रष्टाचार छानबिन शाही आयोगको सचिव थिए। राजाको प्रत्यक्ष शासनबाट हौसिएर न्यायपरिषद्को स्वीकृत नलिई भक्तबहादुर कोइराला अध्यक्ष रहेको उक्त आयोग सचिवमा गएको आरोप यीनलाई छ।
जनआन्दोलन सफल भएपछि गिरिजाप्रसाद कोइराला सरकारले गठन गरेको एउटा आयोगले शम्भुलाई कारबाही गर्न भनेको थियो।
पनुरावदेन अदालतको मुख्य न्यायाधीश माधव ओझाको संयोजकत्वमा बनेको समितिले शाही आयोगले गरेको 'ज्यादती'मा यीनलाई पनि दोषी करार गरेको स्रोतले जानकारी दिएको छ।
'अहिले न्यायाधीश बढुवामा त्यो पुरानो रेकर्ड पल्टाएको देखिएन,' न्यायपरिषद्का एक पूर्व सदस्यले भने, 'अन्यथा शम्भु ठीकै न्यायाधीश हुन्।'
पुनरावेदनको यो सिफारीससँगै कार्यसम्पादनमा कुनै गम्भीर त्रूटी नगरे मीरा केहि वर्षमा सर्वोच्च जाने बाटो खुलेको छ। महिला हुनुले पनि पदोन्नतीमा भने अब श्रीमतीलाई सजिलो पर्ने अनुमान स्रोतहरुले गरेका छन्।
तीन महिनासम्मको निरन्तरको छलफलपछि परिषदको मंगलवार अपरान्ह बसेको बैठकले सोह्र जनाको सिफारिश गरेको हो। छ नम्बरका सुरेन्द्रवीरसिंह बस्न्यातबाहेक सबै सिनियरीटीको आधारमा मुख्य न्यायाधीश भए।
'राम्रा, ठीकै जो पनि बढुवा भएको बेला सुरेन्द्रलाई मात्र बिना आधार पन्छाउनुको औचित्य देखिएन,' ती सदस्यले भने, 'खरो स्वभावका यी करिअर न्यायाधीश अहिले मुख्यमा परेका धेरै भन्दा राम्रा हुन्।'
