विशेष अदालतका रजिष्ट्रार नातिबाबु लामिछाने सधैँजस्तो सोमबार पनि सवा नौ बजे बवरमहलस्थित कार्यालय पुगे। सर्लाहीको मलङ्गवा ६ कि सजरा खातुन उनी आउनुअघि नै अदालत आइपुगेकी थिइन्।
उनलाई अख्तियारले मलंगवा वार्ड नम्बर ६ मा समुदायिक प्रावि नाम गरेको झोले विद्यालय खडा गरेको आरोप लगाएर भ्रष्टाचार मुद्दा चलाएको छ। डेढ महिनाअघि दायर गरेको मुद्दामा बयानका लागि खातुन हाजिर हुन आएकी हुन्।
उनको निवेदन पढेपछि रजिष्ट्रार लामिछानेले खातुनको हाजिरी गराए र अख्तियारको अभियोग पत्रसहितको मिसिल इजलासमा पठाए। विशेषका कर्मचारीहरु टिकाध्वज कार्की र शिवप्रसाद ढकालले उनको बयान लिए।
उनको बयान सकिएपछि न्यायाधीशसमक्ष मिसिल पेश भयो। सरकारी र खातुनका वकिलले बहस गरे।
बहस सुनेर न्यायाधीशले समान्य तारेखमा राख्न वा धरौटी माग्ने आदेश गर्छन्। त्यसपछि बल्ल उनको मुद्दा पेशीमा चढ्ने छ।
खातुनपछि अख्तियारले भ्रष्टाचारको मुद्दा चलाएका अन्य २ वटा झोले विद्यालयका ४ जना प्रतिवादी, वन विभागको मुद्दाका १ जना प्रतिवादी र नक्कली प्रमाणपत्रसम्बन्धी मुद्दाका १ जना प्रतिवादी पनि हाजिरका लागि आएका थिए। उनीहरु सबैको हाजिर, बयानपछि न्यायाधीशहरुले थुनछेक बहस र आदेश गरे। यति गर्दा सोमबारको दिन गयो।
पेशीमा चढेको वैदेशिक रोजगारको मुद्दा न्यायाधीशहरुले हेर्नै भ्याएनन्।
विषेश अदालतमा एउटा मात्रै इजलास छ। तीन जना न्यायाधीशको इजलासले अचेल थुनछेकबहस सुनेर आदेश गर्दागर्दै पेशीमा चढेका मुद्दा हेर्न भ्याउँदैनन्।
‘हाजिर हुन आएकालाई त्यही दिन थुनछेक आदेश गरेर पठाउने नीति छ,’ रजिष्ट्रार लामिछानेले भने, ‘बयानका लागि प्रतिवादी थोरै आए भने मात्रै न्यायाधीशले नियमित पेशीका मुद्दा सुनुवाइ गर्न पाउनुहुन्छ।’
अख्तियारले गतवर्ष २ दिनमा एउटाको दरले मुद्दा दायर गर्यो।
अख्तियारले गतवर्ष अघिल्लो वर्षभन्दा झण्डै दोब्बर मुद्दा विषेश अदालतमा दायर गरेको थियो। तर, विशेषले भने अघिल्ला वर्षभन्दा थोरै मुद्दा फैसला गर्न भ्यायो।
अख्तियारले ल्याएका बाहेक सम्पत्ति शुद्धीकरण विभागले ल्याएका मुद्दा पनि हेर्ने गर्छ। विशेषमा दिन दिनै मुद्दाको चाप बढ्दै गएको छ।
तर, ती मुद्दामाथि सुनुवाइ हुने पालो आउन भने महिनौँ लाग्न थालेको छ। विशेषमा, अघिल्ला वर्षदेखि अख्तियार र सम्पत्ति शुद्धीकरण विभागले ल्याएका २ सय ४ वटा मुद्दा पालो कुरेर बसेका छन्।
भ्रष्टाचार र सम्पत्ति शुद्धीकरणसम्बन्धी एउटै मुद्दामा पनि प्रतिवादीहरु धेरै हुने भएकाले पनि अरु मुद्दाको सुनुवाइ प्रभावित हुन्छ। गएको वर्ष दायर भएको विद्युत प्राधिकरणमा भएको भ्रष्टाचारसम्बन्धी ४ थान मुद्दामा ७१ जना प्रतिवादी छन्। वैदेशिक रोजगार विभागले श्रम स्वीकृति दिँदा भएको भ्रष्टाचार सम्बन्धी एउटै मुद्दामा ६५ जना प्रतिवादी थिए।
विशेषले यस्ता मुद्दामा सबै प्रतिवादीको बयान र थुनछेक आदेश गर्दा समय खर्च हुने भएकाले मुद्दा फछ्र्यौटमा गतवर्षको तुलनामा कमी आएको बताएको छ।
‘धेरै प्रतिवादी भएका मुद्दामा थुनछेक आदेशसमेत गर्नुपरेकाले मुद्दाको सुनुवाइ र फछ्र्यौटमा कमी आएको’ विशेषले सर्वोच्च अदालतलाई पठाएको वार्षिक प्रतिवेदनमा उल्लेख छ।
लामिछानेका अनुसार एक दिनमा बढीमा ५ वटा मुद्दाका प्रतिवादीको हाजिरी, बयान र थुनछेक आदेश गर्न भ्याइन्छ।
‘थोरै प्रतिवादी छन् भने ५ वटा मुद्दाका प्रतिवादीको बयान गराउँछौँ, बयानपछि लगत्तै मुद्दा थुनछेकका लागि इजलासमा जान्छ, अरु मुद्दाको सुनुवाइका लागि समय पुग्दैन,’ उनले भने।
गतवर्ष विशेषले २ सय १६ वटा मुद्दा फछ्र्यौट गर्ने लक्ष्य लिएको थियो तर १२१ मात्र भ्यायो। उसले फछ्र्यौट गर्न बाँकी मुद्दा नै २ सय ४ भए। विशेषले अर्को इजलास खडा गर्न माग गर्दै सर्वोच्च अदालतलाई पत्र लेखिसकेको छ।
प्रकाशित मिति: 2014-08-26 16:05:00
