पर्यटनमन्त्री भीम आचार्य सहभागी एक कार्यक्रममा सोमबार एमाले नेता/कार्यकर्ताले कालोसिसा भएको गाडी प्रयोग गरेका छन्। होटल इस्टर्न स्टारमा आयोजित विराट क्षेत्रको पर्यटन विकासका लागि आगामी कार्ययोजना सम्बन्धी विचार गोष्ठीमा सहभागी बन्न आएका मन्त्री आचार्य सहभागी कार्यक्रममा को १ च ४१४७ नम्बरको गाडी प्रयोग गरिएको हो।
कानुनतः कालोसिसा प्रयोग गैरकानुनी रहे पनि यो गाडीलाई निर्वाध चल्न दिइएको छ। उक्त गाडीमा पहिले सभासद् राजलक्ष्मी गोल्छा चढि्थन्। यो उनको निजी सवारी हो।
कालोसिसा प्रयोग गरेको दबाब खप्न नसकेपछि गोल्छाले यो गाडी प्रयोग गर्न छोडेकी छिन्। उनी बा११च ३८५७ नम्बरको नयाँ गाडी प्रयोग गर्छिन्। धनाढ्य भएका नाताले एमाले सभासद् बनेको आरोप लाग्ने गरेकी उनले बेला–बखत उक्त गाडी पार्टी नेता/कार्यकर्तालाई दिने गरेकी छिन्।
एमाले सम्बद्ध स्रोतका अनुसार पर्यटनमन्त्री आचार्यलाई स्वागत गर्न यो गाडी सोमबार विराटनगर विमानस्थलमै पुगेको थियो। अति विशिष्ट व्यक्ति (भीभीआईपी) समेतले गृहमन्त्रालयको अनुमतिबिना कालोसिसा भएको सवारी चलाउन पाउँदैनन्। भीभीआईपीले सुरक्षाको कारण देखाउँदै मागे पनि गृहमन्त्रालयले 'उपयुक्त' ठानेमात्र कालोसिसा प्रयोग गर्न अनुमति दिन्छ।
सुरक्षा स्रोतका अनुसार कालोसिसा कसैले प्रयोग गरेको भेटिए पहिले फेर्न सचेत गराइन्छ। राजलक्ष्मीको हकमा पनि त्यो भइसकेको छ। 'कालोसिसा हटाउन पहिले सचेत गराउने नियम छ, त्यसका लागि केही समय दिइन्छ,' पूर्वक्षेत्रीय ट्राफिक प्रहरी प्रमुख एसपी पूजा सिंहले सेतोपाटीलाई भनिन्, 'हामीसँग उहाँले समय माग्नुभएको छ।'
एसपी सिंहले कतिसमय दिइएको भन्ने खुलाइनन्। सेतोपाटीमा समाचार प्रकाशित भएपछि पूर्वक्षेत्रीय प्रहरी प्रमुख नवराज सिलवालले राजलक्ष्मीको गाडीको कालोसिसाबारे 'चासो' राखेका थिए। उनले एसपी सिंह र जिल्ला ट्राफिक प्रहरी कार्यालय मोरङलाई निर्देशन समेत दिएको सुरक्षा स्रोतले जनाएको छ।
डीआईजी सिलवालका अनुसार विदेशबाट सेतोसिसा अर्डर गरिसकेको 'स्लीप' राजलक्ष्मीले ट्राफिक कार्यालयमा बुझाएकी छिन्। 'भरेभोलि नै आइपुग्ने भन्ने कुरा आएकाले हामीले थप कारबाही गरेनौं,' सिलवालले भने।
