यवस्थापिका संसद अर्न्तगत विभिन्न समितिहरुका सभापतिहरुको चयन भदौ ११ गते हुने भएको छ।
प्रमुख राजनीतिक दलहरुबीच आपसी भागण्डामा सहमति भएपश्चात संसद सचिवालयले विधायन समिति, दशवटा विषयगत समितिहरु (सार्वजनिक लेखा समिति बाहेक) र संसदीय सुनुवाई समितिको सभापतिको निर्वाचन कार्यतालिका तय गरेको हो।
सचिवालयले प्रकासित गरेको कार्यक्रम अनुसार समितिका सभापतिहरुका लागि सम्बन्धित समितिका सदस्यहरुले मंगलबार साँझ ५ बजेसम्म उम्मेदवारी दर्ता गर्न सक्ने छन्। संबन्धित समितिले सभापतिका लागि निर्वाचन भने बुधबार साँझ ५ बजेमात्रै गर्ने छ।
संविधानसभामा जस्तै प्रमुख राजनीतिक दलहरुबीच संसदीय समितिमा पनि भागवण्डाका आधारमा सभापतिहरुकेा बाँडफाँट भएको छ। दलका नेताहरुले दिएको जानकारी अनुसार, सत्तारुढ दल नेपाली कांग्रेस र एमालेका भागमा चार चार समिति, एमाओवादीलाई दुइ, राप्रपा नेपाललाई एक मधेसी दलका लागि एक र अन्य साना दलका लागि एक समिति दिइएको छ।
जसअनुसार, कांग्रेसको भागमा राज्य व्यवस्था समितिमा दिलबहादुर घर्ति, संसदीय सुनुवाइ समितिमा कुलबहादुर गुरुङ, कृषि तथा जलस्रोत समितिमा गगन थापा र उद्योग, बाणिज्य तथा उपभोक्ता हित सम्बन्ध समितिमा भिष्मराज आङदम्बेलाई सभापति बनाइने भएको छ।
त्यसैगरी एमालेको कोटामा परेका विकास समितिमा रवीन्द्र अधिकारी, अर्थ समितिमा प्रकाश ज्वाला, सुशासन तथा अनुगमन समितिमा शेरधन राइ र महिला, बालबालिका, जेष्ठ नागरिक र समाज कल्याण समितिमा रन्जुकुमारी झाले सभापति पदकालागि उम्मेदवारी दिने भएका छन्।
प्रमुख प्रतिपक्ष दल एमाओवादीको कोटामा परेका दुई समितिहरु मध्ये अन्तर्राष्ट्रिय सम्बन्ध तथा श्रम समितिमा प्रभु साहको उम्मेदवारी पर्ने भएको छ। विगतको परम्परा अनुसार विपक्षी दलको कोटामा पर्ने लेखा समितिको सभापतिमा जनार्दन शर्मा यसअघि नै निवाचित भइसकेका छन।
त्यसैगरी राप्रपा नेपालले सुशिलकुमार श्रेष्ठलाई सामाजिक न्याय तथा मानव अधिकार समितिमा पठाउने पक्का भएको छ भने वातावरण समितिको सभापतिमा मधेसी जनअधिकार फोरमका जनकराज चौधरीको नाम आएको छ।
अन्य साना दलको कोटामा परेको विधायन समितिमा भने साना दलहरुबीच कस्ले पाउने भन्ने आपसी बिवाद कायम रहेको छ।
यसैबीच प्रमुख ठूला दलका शीर्ष नेताहरुले संसदीय समितिका सभापतिहरुको भागवण्डामा साना दलहरुलाई बेवास्ता गरेको भन्दै केही साना दल तथा स्वतन्त्र सभासदहरुले विरोध स्वरुप उम्मेदवारी दिने तयारी गरेपछि प्रधानमन्त्री सुशील कोइरालाले उनीहरुलाई मंगलबार बिहान बार्तामा बोलाएका छन्।