पथरी-शनिश्चरे नगरपालिका विवाद अन्ततः समाधान भएको छ।
सरकारले गत जेठ २५ गते घोषणा गरेको पथरी-शनिश्चरे नगरपालिकाको केन्द्र राख्ने विषयमा विवाद हुँदा अझैसम्म सञ्चालनमा आउन सकेको थिएन। बिहीबार बसेको राजनीतिक दल स्थानीय समाजसेवी र पत्रकारहरुको संयुक्त रूपमा बैठकले विवाद समाधान गरेको हो।
नगरपालिकाको केन्द्र राख्ने बिषयलाई लिएर पथरी र शनिश्चरेका राजनितिक दलबीच बिबाद चर्केको थियो।
पथरी-शनिश्चरे नगरपालिकाका कार्यकारी अधिकृत गणेशराज कार्कीको अगुवाईमा दुबै र्तफका प्रतिनिधिलाई राखेर भएको छलफलबाट सरकार र पुनरावेदन अदालतले घोषणा गरेको साविक शनिश्चरे १ मा जग्गा तथा भौतिक पूर्वाधार नभएको हुँदा तत्कालको लागि साविक पथरी गाविसको कार्यालयबाटै कार्य सम्पादन गर्ने सहमती भएको छ।
प्रमुख जिल्ला अधिकारी गणेशराज कार्की र स्थानीय विकास अधिकारी नारायणप्रसाद मैनालीको रोहबरमा शुक्रबार पथरीमा पत्रकार सम्मेलन गर्दै सहमती पत्र सार्वजनिक गरेको थियो।
सहमती पत्र अनुसार २०६८ साउन ३२ गते भएको आपसी सहमती अनुसार पुनरावेदन अदालतमा दायर रिट फिर्ता लिने निर्णय भएको छ।
सरकारको निर्देशन तथा पुनरावेदन अदालतको आदेशको सम्मान गर्दै स्थानीय जनभावनाको कदरस्वरूप दैनिक काम सञ्चालनका लागि यस्तो निर्णय लिइएको हो।
पथरी-शनिश्चरे नगरपालिकाको भावि योजना अनुसार राजमार्ग आसपासमा नयाँ कार्यालय भवनका लागि जग्गा खोज्न ७ सदस्यीय समिति रहने निर्णय समेत गरेको पथरी-शनिश्चरे नगरपालिकाका अधिकृत कार्कीले बताए।
यसअघिका कार्यकारी अधिकृत बासुदेब ढकालले पथरी र शनिश्चरेका स्थानीय राजनीतिक दलका कार्यकर्तालाई अनावश्यक कुरा लगाएको हुँदा विवाद भएको राजनीतिक दलको बुझाई छ।
नोटःनगर अधिकृत र सिडयोको नाम थर एउटै छ।
