उपप्रधान तथा गृहमन्त्री वामदेव गौतमले स्थानीय निकायको निर्वाचन संविधान जारी हुनुभन्दा पहिले नै गर्नुपर्ने बताएका छन् ।
अखिल नेपाल किसान सङ्घद्वारा शुक्रबार आयोजित ‘राष्ट्रिय प्रशिक्षण भेला’ को उद्घाटन गर्दै उनले नेपालको अन्तरिम संविधानमा उल्लेख भएअनुसार स्थानीय निकायको निर्वाचन संविधान जारी गर्नुभन्दा पहिला नै गर्नुपर्नेमा जोड दिए ।
सङ्घका अध्यक्षसमेत रहनुभएका गौतमले भने, “अन्तरिम संविधानको पालना गरेर जानुपर्छ, त्यसले गर्दा संविधान जारी गर्नुभन्दा पहिला नै स्थानीय निकायको निर्वाचन गर्नु उपयुक्त हुन्छ ।” गृहमन्त्री गौतमले सरकारले भू–उपयोग नीति लागू गरेको र त्यसको कार्यान्वयनमा ध्यान दिनुपर्ने आवश्यकता औँल्याउँदै कृषियोग्य जमिनमा घर बनाएर बस्ती बसाउन नहुने नीतिगत व्यवस्था भएको बताए ।
उनका अनुसार कृषियोग्य जमिनमा बस्ती नबसालेर कृषि उत्पादन नहुने स्थानमा मात्र बस्ती बसाउनुपर्ने कुरा भू–उपयोग नीतिमा स्पष्टसँग उल्लेख गरिएको छ । रासस