भारतीय प्रधानमन्त्री नरेन्द्र मोदीको नेपालको राजकीय भ्रमणको सुरक्षा र रातारात अन्य तयारी पूरा गरिदै छ। त्यसमध्ये त्रिभुवन विमानस्थलमा उत्रिएदेखि काठमाडौंमा आयोजना हुने मोदीका कार्यक्रमहरुको अन्तिम 'रिहर्सल' शनिवार बिहान गरिने भएको छ। रिहर्सलमा मोदी काठमाडौंमा आए जस्तै गरि सम्पूर्ण तयारी प्रदर्शन गरिने छ। सम्भवत उपप्रधामन्त्री तथा गृहमन्त्री वामदेव गौतम, प्रधानसेनापति गौरव शम्शेर जबरा लगायत सुरक्षा निकायका प्रमुखहरु सहभागि भई रिहर्ल्सल हुनेछ।
दुई दिने नेपाल भ्रमणमा आउन लागेका भारतीय प्रधानमन्त्री मोदीको भ्रमणमा सुरक्षा तयारीका लागि नेपाली सुरक्षाकर्मीहरु खट्नु पर्ने भएको छ। भारतीय प्रधानमन्त्रीको एडीडीसीका लागि नेपाली सेनाको विशेष सुरक्षा बलका गणपति महासेनानी विनोद पाण्डे खटिएका छन्। साथै उनको कमानमा अन्य सुरक्षाकर्मी समेत परिचालित हुने छन्।
मोदीको भ्रमणको प्रत्यक्ष सुरक्षामा खटिने नेपाल प्रहरी, सशस्त्र प्रहरी र नेपाली सेनाका लगायत अन्य सुरक्षाकर्मीका लागि छुट्टै पासको व्यवस्था गरेको छ। नेपाल प्रहरी प्रधान कार्यालयमा शुक्रबार रातभरमा झण्डै मोदी सुरक्षामा खटिने १ हजार सुरक्षाकर्मीका लागि पास तयार पारिने छ।
मोदी नेपाल भ्रमणमा आउन झण्डै ३४ घण्टा बाँकी रहँदा मोदीको सुरक्षाका लागि भारतीय सुरक्षाकर्मीहरु नै सक्रिय रुपमा खटिरहेका छन्। नेपाली सुरक्षाकर्मीहरु चाही भारतीय सुरक्षाकर्मीको सहयोगीको भूमिका रहेको देखिएको छ। किनभने बिहीवार र शुक्रबार दिनभर मोदी सुरक्षाका लागि आएका भारतीय सुरक्षाकर्मी कै उपस्थितिमा सुरक्षाकर्मीहरुले 'फिजिकल चेकजाँच' गर्दै हिडेका छन्।
मोदी काठमाडौंमा आउँदा नेपाली सेनाले १९ तोपको प्रधानमन्त्री सलामी दिने भएको छ। किनभने सरकारले मोदीको भ्रमणलाई राजकीय भ्रमण बनाउने निर्णय गरिसकेको छ।
मोदी अन्तर्राष्ट्रिय विमानस्थल आइपुग्दा प्रधानमन्त्री सुशील कोइरालाले गौचर व्यारेकस्थित अतिविशिष्ट कक्षमा स्वागत गर्ने छन्। त्यसपछि कोइरालाले प्रधानसेनापति गौरव शम्शेर जबरालाई संक्षिप्त परिचय गराउने कार्यक्रम तय भएको छ। त्यसपछि प्रधानमन्त्री कोइराला र प्रधानसेनापति राणाले प्रधानमन्त्री मोदीलाई स्कर्ट गरि १९ तोपको 'प्रधानमन्त्री सलामी' दिइने छ। प्रधानसलामी दिइदा नेपाल र भारत दुबै देशका राष्ट्रिय धुन बज्ने छ।
यस अघि विदेशी राष्ट्राध्यक्षहरु नेपालको राजकीय भ्रमणमा आउँदा स्वागत र विदाईमा मात्र १९ तोपको सलामी दिइने चलन थियो। त्यसपछि मात्र अन्य महानुभावले स्वागत गर्ने कक्षमा लगिने छ।
मोदी आएका वखत अन्तर्राष्ट्रिय विमानस्थलमा 'फलाइट नो टाइम' लागू गरिने छ। त्यस बेला कुनै पनि अन्य आन्तरिक तथा बाहय जहाज कम्तिमा ३० मीनेट अवतरण र उडान भर्न पाउने छैनन्।
एयरपोर्टमा मोदी आइपुग्नु विहानै देखि पासवाला सवारी साधनबाहेक अन्य कुनै पनि सवारी साधन छिर्न पाउने छैनन्। मोदी सवारी चल्ने रुटमा पूरा सडक खाली गरिने छ। सडक सवारीका बेला मोदीको नेपाली सेनाले हवाई गस्ती समेत गर्ने भएको छ।
सुरक्षा स्रोतका अनुसार मोदी भारतमा मात्र नभएर विश्वमै अत्यन्तै सुरक्षा जोखिम भएका अतिविशिष्ट पाहुना भएकाले यो स्तरको सुरक्षा प्रवन्ध गर्न लागिएको हो ।