भारतीय प्रधानमन्त्री नरेन्द्र मोदीको आसन्न भ्रमणको विषयलाई लिएर नेपालका राजनीतिक दल, नागरिक समाज र मिडियामा व्याप्त चर्चाप्रति व्यंग्य गर्दै एमाओवादीका सभासद राम कार्कीले भने, यो महिनौसम्म चाडजस्तो किन गरिएको?
व्यवस्थापिका संसदको बैठकमा विशेष समय लिएर बोल्दै एमाओवादी नेता कार्कीले सोधे, 'दशै १० दिनको हुन्छ, तिहार (पञ्चक) ५ दिनको तर भारतीय प्रधानमन्त्री मोदी नेपाल आउदा महिनौ सम्म चाड जस्तो?'
व्यग्यात्मक शैलीमा कार्कीले भने अहिले नेपालको सरकार र राजनीतिक दलका नेताहरुले मामा आउदैछन्, नाना, चाचा, पापा ल्याउलान् भन्ने तबरले नसोचौ।
लामो समयको अन्तरामा भारतमा स्पष्ट बहुमतको सरकारको प्रमुख नेपाल भ्रमणमा आउदा अब नेपालले तुरुन्त सबै सन्धि सम्झौता गर्ने कुरा गरिहेको प्रति आपत्ति जनाउदै उनले भने, नेपालमा अहिले मात्रै होइन विगत केही वर्षदेखि जनताले लोडसेडिङको मार बेहोर्नु परेको छ।
तर अहिले भारतीय प्रधानमन्त्री आउदा नेपालले राजनीतिक रुपमा भारतसँग डिल गर्नु पर्छ, उनले भने, तर त्यो डिलमा हामी भन्दा पनि भारत ठूलो मुलुक भएको नाताले उदार भइ साझा हितका विषयमा सहमति गर्नु पर्छ।
उनले नेपालको राजनीतिक नेतृत्वलाई यसपटक भारतीय पक्षसँग वार्ता र सम्झौता गर्दा राष्ट्रिय स्वार्थलाई दृढ भएर राख्न सुझाव समेत दिएका थिए।