प्रधानमन्त्री सुशील कोइराला सहित प्रमुख राजनीतिक दलका नेताहरुप्रति घुमाउरो पाराले उदसिनताको आरोप लगाउँदै व्यवस्थापिका संसद अर्न्तगत सार्वजनिक लेखा समितिकेा सभापतिको चयन गर्ने उद्घोष गरेका सभामुख सुवासचन्द्र नेम्वाङ दुई दिनभित्रै आफ्नो अडानबाट पछि हटेका छन्।
प्रमुख दलका नेताहरुले ससदीय समितिका सभापतिहरुको चयनका लागि आवश्यक सहमति निर्माण कार्यमा गम्भीर हुन नसकेको आरोप लगाउँदै साउन १२ गते पत्रकारहरुसँग आफ्नै कार्यकक्षमा कुरा गर्दै सभामुख नेम्वाङले पहिलो चरणमा लेखा समितिको सभापति साउन १६ गते चयन गर्न प्रक्रिया अगाडि बढाउने बताएका थिए।
हेर्नुहोस् समाचारमा-नेताहरुको सहमतिबिनै सभामुखले तोके सभापति निर्वाचन
त्यस लगत्तै संसद सचिवालयले दैनिक बुलेटिन मार्फत साउन १६ गते बिहान ११ वजे लेखा समितिकेा सभापति निर्वाचित हुने जानकारी दिएको थियो। उनले १२ गते नै प्रमुख दलका सचेतकहरुलाई १५ गतेसम्ममा पनि कुनै सहमति नगरे अन्य समितिको सभापति चयनको कार्यतालिका समेत प्रकाशीत गरी प्रक्रिया अगाडि बढाउने जानकारी दिएका थिए।
हेर्नुहोस सचिवालयले १२ गते प्रकाशन गरेको सूचना
तर, बुधबार अपरान्ह संसदभवन नयाँवानेश्वरमा पत्रकारहरुसँग कुरा गर्दै १६ गते हुने भनेको सार्वजनिक लेखा समितिको सभापति चयन प्रक्रिया हाललाई स्थगित भएको बताए। यसअघि आफूले गरेको निर्णयबाट पछि हड्नुको कारणबारे सोधिएको प्रश्न छल्दै नेम्वाङले भारतीय प्रधानमन्त्री नरेन्द्र मोदीको भ्रमण लगायतका अन्य कारणले हाललाई प्रक्रिया रोकिएको बताए।
उनले लेखा समितिका साथै अन्य समितिको सभापतिहरुकेा चयन साउन मसान्तभित्र गरिसक्ने बताए।