जिल्ला अदालत काठमाडौँले गत वर्ष लक्ष्यभन्दा बढी मुद्दा फर्छ्यौट गरेको छ।
६० प्रतिशत मुद्दा फर्छ्यौट गर्ने लक्ष्य लिएको जिल्ला अदालत काठमाडौँले ६० दशमलब ३ प्रतिशत मुद्दा छिनेको छ।
काठमाडौँ जिल्ला अदालतमा गतवर्ष १६ हजार ९ सय ४७ मुद्दा थिए। ती मध्ये १० हजार १ सय ७८ वटा मुद्दा फर्छ्यौट गरेको छ।
‘हामीले लिएको लक्ष्यभन्दा बढी मुद्दा फर्छ्यौट भएका छन्,बीचमा दुईवटा चुनावमा न्यायाधीशहरु खटिन नपरेको भए अझ धेरै हुन सक्थ्यो,’ जिल्ला अदालतका श्रेष्तेदार श्रीप्रसाद सन्जेलले भने।
जिल्ला अदालतमा १९ जना न्यायाधीश कार्यरत छन्। तर अझै पनि ६ हजार ७ सय ६९ मुद्दा भने बाँकी नै छन्।
दुईवर्षभन्दा पुराना १ सय ५५ वटा मुद्दा अझै छिनिएका छैनन्। २ वर्ष भन्दा पुराना मुद्दा थाँति राख्न नहुने नीति छ।
त्यहाँ कार्यारत न्यायाधीशमध्ये राजेश काफ्लेले सबै भन्दा धेरै मुद्दा फर्छ्यौट गरेका छन्।
उनले गत वर्ष ७ सय १ वटा मुद्दा छिनेको जिल्ला अदालत काठमाडौँले जनाएको छ।
उनले फौजदारी मुद्दा हेर्छन्। मुद्दा फर्छ्यौटमा दोस्रो हुने न्यायाधीश भने मोहम्मद जैनुद आजाद हुन्। उनले ६ सय ९९ वटा मुद्दा छिनेका छन्।
देवानी मुद्दा हेर्ने न्यायाधीश मध्ये खिलनाथ रेग्मी ५ सय ७५ मुद्दा छिनेर पहिलो भएका छन्।
जिल्ला अदालत काठमाडौँका सबै भन्दा सिनियर न्यायाधीश अच्युत विष्ट भने सबै भन्दा थोरै मुद्दा छिन्ने न्यायाधीश हुन्। उनले जम्मा २ सय ९१ वटा मुद्दा सकाए।
गतवर्ष जिल्ला अदालतले १ अर्ब ६५ करोड १४ लाख ९८ हजार ७ सय ६५ रुपैँया जरिवाना असुलेको छ।
उसले अझै ४ अर्ब ५९ करोड ६२ लाख ७६ हजार ६ सय ९ रुपैँया जरिवाना असुल्न बाँकी छ। मुलुकभरमा सबै भन्दा बढी जरिवाना असुल्न बाँकी भएको अदालत नै काठमाडौँ जिल्ला अदालत हो। यहाँ मुद्दा पनि अरु जिल्ला अदालतभन्दा बढी हुन्छन्।
प्रकाशित मिति: 2014-07-29 18:13:14
