ऊर्जामन्त्री राधा ज्ञवालीले भारतीय प्रधानमन्त्री नरेन्द्र मोदीको नेपाल भ्रमणका क्रममा दुई देशबीच ऊर्जा व्यापार सम्झौता हुने बताएकी छन्।
व्यापार सम्झौताबारे विभिन्न टीकाटिप्पणी भइरहेकाबेला ऊर्जामन्त्री ज्ञवालीले आज आफ्नै कार्यकक्षमा पत्रकारहरूसँग कुरा गर्दै राजनीतिक सहमति गरी मन्त्रिपरिषद्बाट पास गराएर सम्झौता हुने विश्वास व्यक्त गरेकी हुन्।
मन्त्री ज्ञवालीले भनिन्,'सदनभित्रका प्रमुख दल र बाहिरका नेकपा–माओवादीलगायतका दलहरूसँग सम्झौताबारे छलफल गरेको छु, उहाँहरू ऊर्जा व्यापार सम्झौताको विपक्षमा नरहेको पाएँ, राजनीतिक सहमति र मन्त्रिपरिषद्को अनुमोदनका आधारमा सहमति हुनेमा म विश्वस्त छु।'
'उज्यालो नेपाल सम्बृद्ध नेपाल'का लागि भारतसँग ऊर्जा व्यापार सम्झौता गर्न मन्त्रालय प्रतिबद्ध रहेको र सोको गृहकार्यमा तीव्ररुपमा लागेको उनले जानकारी दिइन्।
मन्त्री ज्ञवालीका अनुसार भारतीय प्रधानमन्त्रीको नेपाल भ्रमणका बेला ऊर्जा मन्त्रालयले खासगरी तीनवटा महत्वपूर्ण विषय ऊर्जा व्यापार सम्झौता, लम्कीदेखि रामबरेलीसम्मको ७६५ केबी भोल्टेजको तेस्रो अन्तरदेशीय प्रसारण लाइन र अर्को तेस्रो आयोजनाको रुपमा तमोर आयोजनाको २५२ मेगावाटको आयोजनालाई प्रस्तावको रुपमा अघि बढाइनेछ।
'नेपालको ऊर्जा विकासका लागि भारतसँग समझदारी गरेर अघि बढ्नैपर्छ, मुलुकको ऊर्जा विकासका लागि अघि नबढी देशको विकास हुन्न, सम्झौताअनुरुप ठूला आयोजनाबाट राष्ट्रिय माग पूर्ति नभई पैठारी गर्ने होइन, हामीलाई प्रयाप्त बढी भएपछि भारतलाई दिने हो नेपाललाई अपुग भएको हिउँदको समयमा भारतबाट लिने हो त्यसैले यो राष्ट्रको हितमै हुन्छ,' मन्त्री ज्ञवालीले भनिन्।
ऊर्जामन्त्री ज्ञवालीले पछिल्लो समय विवादमा बनेको स्वदेशी लगानीको चिलिमे जलविद्युत् आयोजनाको समस्याबारे समिति गठन गरी छानबिन गर्न निर्देशन दिएको र छानबिन समितिको प्रतिवेदनपछि आवश्यक निर्णय लिइने जानकारी दिइन्।
भारतीय प्रधानमन्त्रीको भ्रमणका बेला के कस्ता कुरालाई लैजाने भन्नेबारे मन्त्री ज्ञवालीले आजै प्रधानमन्त्री सुशील कोइरालासँग परामर्श गरेकी थिइन्।रासस
