प्रधानमन्त्री सुशील कोइराला र अन्य प्रमुख राजनीतिक दलका नेताहरुको सहमतिबिनै सभामुख सुवासचन्द्र नेम्वाङले पहिलो चरणमा संसद अन्तर्गतको सार्वजनिक लेखा समितिको सभापतिको चयनको कार्यतालिका तय गरेका छन्।
पटकपटकको आग्रहका बाबजुद प्रधानमन्त्री कोइराला र राजनीतिक दलका शीर्ष नेताहरुले संसदीय समितिका सभापतिहरुको चयनमा आवश्यक सहमति कायम गर्न चासो नदेखाएपछि सभामुख नेम्वाङले साउन १६ गते लेखा समितिको सभापतिको चयनको कार्यतालिका सार्वजनिक गर्न संसद सचिवालयलाई निर्देशन दिएका हुन्।
'मैले अन्तिमपटक साउन ५ गते सबै दलका नेताहरुलाई १० गतेभित्र सभापतिको विषयमा टुंगो लगाउन आग्रह गरे, तर नेताहरुको चाला हेर्दा कुनै सकारात्मक पहल नलिएपछि समितिको कामकारबाही प्रभावकारी बनाउन मिति तय गरेको हुँ,' पत्रकारसँग नेम्वाङले भने।
विगतको प्रचलनमा पनि सर्वाजनिक लेखा समितिको सभापति प्रमुख प्रतिपक्षको भागमा पर्ने भएकाले त्यस समितिको सभापति चयनका लागि खासै समस्या नपर्ने भएकोले सभामुखले कार्यतालिका तय गरेका हुन्।
यसै गर्नु थियो भने किन यसअघि नै प्रक्रिया अगाडि नबढाएको त भन्ने प्रश्नको जवाफमा सचिवालयका एक अधिकारीले यो विषयमा एमाओवादीले आफ्नो कोटामा पर्ने लेखा समितिको सभापतिका लागि अरु कुनै समितिमा परेका सभासद्लाई पठाउन चाहेका भए समय मिलोस् भनेर ढिलाइ गरेको बताए।
सभामुख नेम्वाङले सोमबार मात्र पनि प्रमुख राजनीतिक दलका सचेतकहरुलाई १४ गतेभित्र अरु समितिको सभापति चयनका लागि साझा धारणा नबनाए आफैँले १५ गते नै सभापति चयनको प्रक्रिया अगाडि बढाउने चेतावनी दिएका छन्।
संसद सचिवालयका अनुसार लेखा समितिको सभापतिको निर्वाचन १६ गते बिहान हुने भएको छ।
प्रकाशित मिति: 2014-07-28 18:13:24