सर्वोच्च अदालतका न्यायाधीश गोपाल पराजुलीले बहसका लागि इजलासको बारमा गएका वरिष्ठ अधिवक्ता हरिहर दाहाललाई झर्कोफर्को गरेका छन्।
न्यायाधीश पराजुलीको इजलासमा परेको पिपल्स डेन्टल कलेजको रिटमा बहसका लागि गएका वरिष्ठ अधिवक्ता दाहाललाई उनले ‘अदालतलाई जोगाउने कोही नभएको’ भन्दै झर्कोफर्को गरेका हुन्।
आइतबार पराजुलीको इजलासमा रिटमा सुरु बहस कानुन व्यवसायी रमेश कोइरालाले गरेका थिए।
उनको बहस सकिएपछि कलेजकै तर्फबाट आएका वरिष्ठ अधिवक्ता दाहाल इजलासको बारमा बहसका लागि उभिए।
दाहाल बारमा उभिएलगत्तै उनलाई बोल्न नदिई न्यायाधीश पराजुलीले आफैँ कुरा सुरु गरेका थिए। पराजुली रिसाएको मुडमा थिए।
‘जताजता पराजुली त्यतै त्यतै मेडिकल कलेज भन्ने समाचार आउँछन्,’ वरिष्ठ अधिवक्ता दाहालसँग झोक्किँदै भने, ‘कलेजमा करोडौँको लगानी भैराखेको छ, पूर्वाधार बनाएको छ, फेरि बीचैमा विभिन्न कारणले रोकिन्छन्, लगानीकर्ताको के हुन्छ? त्यता पनि अदालतले हेर्नुपर्छ।’
इजलासमा उपस्थित एक कानुन व्यवसायीका अनुसार, न्यायाधीश पराजुलीको स्वर ‘असामान्य र अलि रिसाएको’ थियो।
‘पत्रिकाले यस्तो लेख्छ, अनि अपहेलना विधेयकको पनि विरोध गर्ने,’ न्यायाधीश पराजुली नरोकी झर्किएका थिए, ‘अदालतलाई जोगाउने कोही छैन।’
त्यसपछि वरिष्ठ अधिवक्ता दाहालले बाहिर आएका कुरालाई मनमा लिएर बस्न नहुने बताए।
‘न्याय दिने आसनमा बसेपछि बाहिर प्रेसमा आएका कुरालाई वेवास्ता गर्नुपर्छ श्रीमान्,’ वरिष्ठ अधिवक्ता दाहालले भनेका थिए, ‘नबिराउनू नडराउनू, अरुले के भने/के लेखे, मनमा लिनु हुँदैन।’
सर्वोच्चले राय दिएर सरकारले संसदमा पठाएको अदालतको अवहेलना सम्बन्धी विधेयकले अभिव्यक्ति स्वतन्त्रतालाई कुण्ठित गर्न खोजेको भनेर वरिष्ठ अधिवक्ता दाहालले विरोध गर्दै आएका छन्। उक्त विधेयकले न्यायाधीशलाई स्वेच्छाचारी बनाउन खोजेको तर्क दाहालले गर्दै आएका छन्।
पराजुलीको एकल इजलासमा पिपल्स डेन्टल कलेजको मुद्दाबाहेक अन्य मुद्दाको पालो कुरेर बसेका कानुन व्यवसायीहरु पनि उपस्थित थिए।
त्रिभुवन विश्वविद्यालयसँग एमबिबिएस पढाउने सम्बन्धन मागेको एक वर्ष पुग्न लाग्दा समेत निर्णय नदिएको भन्दै पिपल्स कलेज यससम्बन्धी रिट लिएर सर्वोच्च गएको थियो।
उक्त कलेजको रिटमाथि बहसका लागि इजलासले रिटका पक्षविपक्षलाई साउन २० गते अदालतमा डाकेको छ।
यसअघि मेडिकल काउन्सिलले आवश्यक पूर्वाधार नपुगेको भन्दै सिट कटौती गरिदिएका ३ वटा मेडिकल कलेजको ४ वटा मुद्दामा न्यायाधीश पराजुलीले काउन्सिलको निर्णय उल्टाइदिएका थिए।
पुनरावेदन अदालत पाटनबाट जानकी मेडिकल कलेज र पिपल्स डेन्टल, सर्वोच्चबाट नोबेल मेडिकल र पिपल्सकै अर्को रिटमा मेडिकल काउन्सिलले गरेको कोटा घटाउने निर्णय पराजुलीले उल्टाएका थिए।