राप्रपा नेपालका अध्यक्ष कमल थापाले प्रतिपक्षमा बसेर एमाओवादीले सत्ताका लागि बार्गेनिङ गरिहेको आरोप लगाएका छन्।
ललितपुरमा सोमबार भएको कार्यक्रममा बोल्दै अध्यक्ष थापाले एमाओवादीलाई संसदमा आफ्नो भूमिका प्रष्ट पार्नका लागि कित्ताकाट गर्न आग्रह गरेका हुन्। प्रतिपक्षको कुर्सीमा बसेर एमाओवादीले कांग्रेस र एमालेलाई सघाइरहेको उनले आरोप लगाए।
दिनहुँ बालुवाटार ढुकेर सत्ताको बागभन्डामा एमाओवादी लागेको उनले दाबी गरे। प्रतिपक्षमा बस्नेले सरकारको त्रुटि औल्याउनुपर्नेमा जोड दिँदै अध्यक्ष थापाले एमाओवादीले सरकारकै गुनगान गाएको बताए।
कांग्रेस एमालेसँग मिलेर एमाओवादीले संसदमा राप्रपा नेपालको आवाज दबाउन खोजेको भन्दै सत्तामोह भए सरकारमा जान उनले एमाओवादीसँग आग्रह गरे।
एमाओवादीको पछिल्लो क्रियाकलापले गरिमामय संसदलाई समेत कमजोर बनाएको उनले दाबी गरे। आगामी माघ ८ गतेभित्र संविधान जारी गर्ने भनेर दलहरुले प्रतिबद्धता जनाएपनि त्यो पूरा नहुने उनले बताए। विगतको ८ महिनामा संविधानसभामा एउटा पनि सहमति नभएको उनले बताए।
राज्यपुर्नसंरचना र शासकीय स्वरुपमा दलहरुबीच पहिलेको भन्दा पनि जटिल विवाद भएको थापाको भनाइ छ। कांग्रेस र एमालेले संविधानसभामा गणितीय दम्भ देखाएकाले र एमाओवादी मोर्चाबन्दीमा लागेकाले एउटा पनि विषयमा सहमति हुन नकसकेको उनले बताए।
कांग्रेस र एमालेले संविधानसभामा गणितिय दम्भ र एमाओवादीको मोर्चाबन्दी, संविधान निमार्णको सबैभन्दा बाधक तत्व भएको थापाको भनाइ छ। संसद र संविधान निमार्णमा आफूहरुलाई वाइपास गरिए संसदमा हंगामा मच्याउन २४ जना नै काफी भएको उनले दाबी गरे।
आफूहरु अहिलेसम्म धैर्यताका साथ बसिरहेको भन्दै उनले सबैलाई समेटेर ३ दल अघि बढ्ने त्यसले ठूलो दुर्घटना निम्त्याउने बताए। भारतीय विदेशमन्त्रीसँग भेट गर्नका लागि पनि ३ दलले सिन्डिकेट खडा गरेको उनले बताए।
थापाले भारतीय विदेशमन्त्री सुष्मा स्वराजसँग छुट्टै भेट गर्न पाएका थिएनन्। उनले सामूहिक डिनरमा भने स्वराजसँग भेट गरेका थिए।
भारतीय प्रधानमन्त्री नरेन्द्र मोदीको नेपालमा हुन लागेको भ्रमणका सहमतिबारे सरकारले आफूहरुसँग पनि छलफल गर्नुपर्ने बताए। आफूहरुसँग छलफल नगरी गरिने सहमति अपूर्ण र अपांग हुने थापाले दाबी गरे।