उपप्रधान तथा गृहमन्त्री वामदेव गौतमले कुनै पनि राजनीतिक दल र शक्तिसँग नडराइ काम गर्न सुरक्षा निकायका सबै अङ्गलाई निर्देशन दिएका छन्। प्रहरीको सरूवा–बढुवामा 'राजनीतिक चासो' राख्ने गरेको आरोप लाग्ने गरेका गौतमले सोमवार विराटनगरमा एक दिने पूर्वाञ्चल क्षेत्रीय सुरक्षा गोष्ठी उद्घाटन गर्दै यस्तो बताएका हुन्।
'कुनै पनि राजनीतिक दल र शक्तिसँग नडराइ काम गर्नुहोस्,' गौतमले भने, 'निष्पक्ष तरिकाले आफ्नो जिम्मेवारी पूरा गर्नुहोस्। अपराध नियन्त्रण गर्ने कुरामा मोलाहिजा नगनूस्।' शान्ति सुरक्षा र अमनचयन कायम गर्न सुरक्षा निकाय चनाखो विश्वसनीय र चनाखो बन्नुपर्ने उनले बताए।
गौतमले कानुनले दिएको जिम्मेवारी पालना गर्ने सिलसिलामा हिच्किचाउन नहुने बताए। अराजकता मच्चाउने, कानुनविपरीत काम गर्नेसँग वार्ता नगर्न निर्देशन दिए।
उनले कानुनबमोजिम काम गर्न र व्यावसायिक दक्षता हासिल गर्न सुरक्षा प्रमुखहरूलाई निर्देशन दिए। 'कार्यक्षेत्रमा काम गर्दा कुनै अफ्ठेरोहरू भए आवश्यक सहयोग गर्ने विश्वास दिलाउँछु,' गौतमले भने।
सुशासनको अनुभूति दिलाउने गरी हाल अबलम्बन गरेको सुरक्षा नीति लेखाजोखा र आवश्यक पुनरावलोकनका निम्ति सुरक्षा भेला महत्वपूर्ण हुने गृहमन्त्री गौतमले बताएका छन्।
गृहमन्त्रालयका सह–सचिव लक्ष्मीप्रसाद ढकालले क्षेत्रीय गोष्ठीहरुको चौथो चरणअन्तर्गत भेला राखिएको बताउँदै हालको सुरक्षा अवस्था र त्यसको मूल्यांकनवाट सुरक्षा नीति परिवर्तन गरिने बताए। पूर्वक्षेत्रमा तस्करी, मानवओसारपसार, लागूपदार्थ, अपहरण र सशस्त्र समूहको गतिविधिले शान्ति सुरक्षामा असर पर्ने गरेको बताउँदै ढकालले सबै विषयमा गोष्ठीमा छलफल हुने बताए।
भेलामा गृहसचिव सूर्य सिलवाल, गृहमन्त्रायका अधिकारीहरु, प्रहरी महानिरीक्षक उपेन्द्रकान्त अर्याल, सशस्त्र प्रहरी महानिरीक्षक कोषराज वन्त, राष्ट्रिय अनुसन्धान प्रमुख जीतबहादुर केसी लगायत उच्च अधिकारीहरू छन्।
भेलामा संविधानसभाको दोस्रो निर्वाचनपछिको सुरक्षा अवस्थावारे 'ब्रिफिङ' हुँदैछ। पूर्वक्षेत्रीय प्रहरी प्रमुख डीआईजी नवराज सिलवालले आगामी सुरक्षा कार्ययोजना, चुनौती र शान्ति सुरक्षाको पछिल्लो स्थितिवारे छलफल हुने बताए।
'चुनावयताको शान्ति सुरक्षा र आगामी कार्ययोजनावारे छलफल हुनेछ,' सिलवालले भने, 'राजनीतिक परिस्थिति, अपराध, शान्ति सुरक्षा, सशस्त्र समूहको प्रभाव/गतिविधिवारे कुरा हुनेछ।' १६ वटै जिल्लाका प्रमुख जिल्ला अधिकारी, अञ्चल प्रमुखहरू, नेपाली सेनाका पृतनापति, गुल्मपति, एसपी, एसपी, डीएसपीहरू छलफलमा छन्।