भारतीय प्रधानमन्त्री नरेन्द्र मोदीको दुई दिने नेपाल भ्रमणलाई 'राजकीय' बनाउन विशेष तयारी सुरु गरिएको छ। भारतीय विदेश मन्त्री सुष्मा स्वराज तीन दिने नेपाल भ्रमण सकेर आइतबार नयाँ दिल्ली फर्के लगत्तै प्रधानमन्त्री कार्यालय, परराष्ट्र मन्त्रालय, सेना, प्रहरी लगायत सरकारी निकाय मोदीको भ्रमण राजकीय बनाउन जुटेका छन्।
प्रधानमन्त्री मोदीको सुरक्षा व्यवस्था मिलाउन भारतबाटै विशेष सुरक्षा दस्ता काठमाडौं आइसकेको छ। प्राप्त जानकारी अनुसार शनिबारदेखि नै भारतबाट आएको विशेष सुरक्षा दस्ता र नेपाली सेनाको सुरक्षा टिमले मोदीको भ्रमण हुने संभावित क्षेत्र र मोदी बस्ने होटल वरपरको क्षेत्रको रेकी सुरु गरिसकेको छ। नेपाली सेना र भारतको विशेष सुरक्षा दस्ताले सादा पोशाकमा काम थालेका हुन्।
काठमाडौंमा मोदी बौद्धस्थित होटल हायतमा बस्ने निश्चित भइसकेको छ।
मोदी आइतबार भारतीय वायु सेनाको विशेष विमानबाट बिहान १०.५० वजे काठमाडौं अवतरण गर्ने छन्। त्रिभुवन अन्तर्राष्ट्रिय विमानस्थलमा अवतरणदेखि भोलिपल्ट नफर्केसम्मको कार्यक्रमहरुलाई लक्षित गरेर सुरक्षा योजना सुरु भइसकेको छ।
मोदी विमानस्थल ओर्लिएदेखि नफर्कदासम्म सुरक्षा जिम्मेवारी नारायणहिटीस्थित नेपाली सेनाको विशेष सुरक्षा बललाई दिइएको छ। जसले पहिले राजाको र हाल राष्ट्रपति तथा उपराष्ट्रपतिको सुरक्षाको सम्पूर्ण जिम्मेवारी लिइरहेको छ।
प्रहरीको भीभीआईपी सुरक्षा टोली पनि परिचालित हुने छ। जसलाई नेपाल प्रहरीका एक जना डीआईजीले नेतृत्व गर्ने छन्।
प्रधानमन्त्री सुशील कोइरालाका बैदेशिक मामिला सम्बन्धी सल्लाहकार दिनेश भट्टराईले नेपाल सरकारको तर्फबाट मोदीको भ्रमणलाई नेपालले अत्यन्तै महत्व र उच्चस्तरको 'राजकीय' बनाउन तयारी सुरु गरिएको बताए।
'१७ वर्षपछि भारतका प्रधानमन्त्री नेपाल भ्रमणमा आउँदै छन्, यसअघि भारतीय प्रधानमन्त्री आइके गुजरालले नेपालको औपचारिक भ्रमण गरेका थिए।
भारतीय प्रधानमन्त्री मोदीलाई एयरपोर्टमा उच्च स्तरको राजकीय सम्मान प्रदान गरिने छ। नेपाली सेना विशेष टुकुडीले मोदीको स्वागत र बिदाई दुबै पटक उनको सम्मानमा प्रधानमन्त्री सलामी 'विशेष सम्मान गारत' दिइने छ।
यो समाचार तयार पार्दासम्म तय भइ नसके पनि प्रधानमन्त्री सुशील कोइरालाले भारतीय समकक्षी मोदीको सम्मानमा आइतबार राजकीय रात्री भोजको आयोजना गर्ने छन्। सिंहदरबारस्थित स्टेट हलमा संभवतः राजकीय रात्री भोजको आयोजना हुनेछ।
भारतीय राजदूतावासबाट मोदीको भ्रमणको क्रममा भेटघाटको सूची प्राप्त भएपछि उच्चस्तरको भेटघाटको व्यवस्था मिलाइने भएको छ। परराष्ट्र मन्त्रालयका प्रमुख शिष्टाचार महापाल कालीप्रसाद पोखरेलका अनुसार भ्रमणको धेरै तयारी नेपालबाट भन्दा भारतीय पक्ष (भारतीय राजदूताबास) बाटै भइरहेको छ।
मोदीले संभवतः नेपाल आएकै दिन प्रधानमन्त्री कोइराला, राष्ट्रपति रामवरण यादवसँग शिष्टाचार भेटवार्ता गर्ने छन्। मोदीले आइतबार नै नेपालको व्यवस्थापिका संसदलाई सम्बोधन गर्ने छन्।
नेपाल आएको दोस्रो दिन सोमबार बिहान मोदीले पशुपतिनाथ मन्दिर गई विशेष पूजा अर्चना गर्ने कार्यक्रम भने तय भइसकेको छ। मोदीको यो भ्रमणको उद्धेश्य साउनको एक सोमबार पशुपतिनाथ मन्दिरको दर्शन गर्नु पनि हो। कुटनीतिक विश्लेषकहरुका अनुसार मोदीले धार्मिक कुटनीतिको माध्यमबाट नेपालसँग सम्बन्ध अझ फराकिलो र भाइचाराको सम्बन्ध स्थापित गर्न चाहेको देखिन्छ।
मोदीको भ्रमण दलमा झण्डै ७० देखि ७५ जनाको टोली हुनेछ। सरकारी कर्मचारी, व्यापारी र उद्योगपतिहरु रहने छन्। संभवतः विदेश मन्त्री सुष्मा स्वराज पुनः मोदीका साथ नेपाल आउने छिन्। मोदीको काठमाडौंबाहिर जाने कार्यक्रम तय भैसकेको छैन।
मोदी आगामी सोमबार (साउन १९ गते ) ५ बजे भारतीय वायु सेनाको विशेष विमानबाटै स्वदेश फर्कने छन्।
