उपप्रधानमन्त्री प्रकाशमान सिंहले आगामी छ महिनाभित्र लिखित संविधान जारी हुने बताएका थिए।
बिपी कोइरालाको जन्म शताब्दीको अवसरमा नेपाली काँग्रेस भक्तपुर जिल्ला समितिले आज बागेश्वरी गाविसस्थित श्रीकृष्ण उच्च माध्यमिक विद्यालयमा आयोजना गरेको बृहत् निःशुल्क स्वास्थ्य शिविरको उद्घाटन गर्दै उनले सरकारको ध्यान संविधान निर्माणमै केन्द्रित भएको बताए।
उपप्रधानमन्त्री सिंहले भने,“२०६४ सालको संविधानसभाले संविधान नबनाएर चार वर्ष खेर गयो, अहिले पनि छ महिना बितिसकेको छ, अब छ महिनाभित्र लिखित लोकतान्त्रिक संविधान जारी गर्नुपर्छ, सरकारको ध्यान यसमै केन्द्रित भएको छ।” सरकारले छ महिनाभित्र संविधान जारी गरेर देशमा राजनीतिक स्थिरता ल्याएपछिमात्र देशको विकासमा तीव्रता आउने उनको भनाइ थियो।
मुलुकमा १०४ वर्षे राणा शासनको अन्त्य र प्रजातन्त्र स्थापनाका लागि बिपी कोइरालाले खेलेको भूमिकालाई कहिल्यै बिर्सन नसकिने चर्चा गर्दै उनले २०६४ सालमा गठन भएको संविधानसभाको माग बिपीले २०१४ सालमै गरेको स्पष्ट पारे।
बिपीकै नेतृत्वमा काँग्रेसले विसं २०१४ को आन्दोलनमा भद्र अवज्ञा गरेर संविधानसभाको माग गरेको चर्चा गर्दै उनले त्यो नभएपछि २०१५ सालमा भएको संसदीय निर्वाचनमा पार्टीले दुईतिहाइ बहुमत ल्याएको बताए।
उपप्रधानमन्त्री सिंहले सरकारले विदेशमा जस्तै काठमाडौं उपत्यकालाई मेट्रोपोलिटन सिटी बनाउन उपत्यकाका सबै गाविसलाई नगरपालिका घोषणा गरी अन्तर्राष्ट्रियस्तरको सहरका रुपमा परिणत गर्ने बताए।सरकारले केही दिनभित्रै हुने नगरपालिका घोषणामा भक्तपुरका गाविसहरुलाई मिलाएर थप नयाँ नगरपालिका घोषणा गरिने जानकारी दिए।
नेपाली काँग्रेस भक्तपुर जिल्ला सभापति गणेशमान चक्रधरको सभापतित्वमा सम्पन्न कार्यक्रममा काँग्रेसका जिल्ला प्रवक्ता प्रवीण वन, बागेश्वरी गाउँ अध्यक्ष यादव अधिकारीलगायतले समयमै संविधान निर्माण हुनुपर्नेमा जोड दिए।
बिहान १० बजेदेखि सुरु भएको शिविरमा नाक, कान, घाँटी, दाँत, आँखा, स्त्री रोग, जनरल फिजिसियनलगायत विभिन्न रोगको स्वास्थ्य परीक्षण गरी निःशुल्क औषधि वितरण गरिएको कार्यक्रम प्रतिनिधि मनोज गिरीले जानकारी दिए।
शिविरमा मध्यपुर अस्पतालका र तिलगङ्गा आँखा अस्पतालका चिकित्सकहरुले सेवा दिएका थिए। रासस