नेकपा (एमाले) का वरिष्ठ नेता झलनाथ खनालका लागि विराटनगर विमानस्थलमा आज बेलुकी उड्न लागेको विमान आधा घन्टा रोकिएको छ।
पुल उद्घाटन गर्न आज बिहान झापाको धुलावारी गएका खनाल फर्कने क्रममा ढिलो भएपछि बुद्ध एयरको विमान सम्पूर्ण तयारी गरी जमिन छाड्न लागेको अवस्थामा आज साँझ ५: २० मा रोकिएको थियो। नेता खनाल विशिष्ट कक्षमा प्रवेश गर्न ढिलो भएपछि धावनमार्गमा उड्न सुरु भएको विमानतर्फ दौडँदै पुगेका थिए।
एमाले मोरङका अध्यक्ष महेश रेग्मी, केन्द्रीय सदस्य जीवन घिमिरेलगायत नेता, प्रहरी एवम् विमानस्थलका कर्मचारीले उड्न गति लिन लागिसकेको विमानका चालकलाई साङ्केतिक रुपमा अनुरोध गरेपछि साँझ ५: ४० मा विमान रोकिएको थियो।
नेता खनाल ढिलो आउँदा विमानस्थलको विशिष्ट कक्षमा एमाले नेता, प्रहरी एवम् विमानका कर्मचारीको दौडधुप हेर्नलायक थियो। सो दृश्य विमानस्थल बाहिर रहेका सर्वसाधारणले पनि उत्साहका साथ हेरेका थिए। उक्त विमान साँझ ५:५० मा काठमाडौका लागि उडेको थियो। रासस
