उपप्रधानमन्त्री एवम् गृहमन्त्री बामदेव गौतमले आपसी हितका आधारमा भारतसँग ऊर्जा व्यापार सम्झौता गरिने बताएका छन्।
धुलिखेलमा शुक्रबार भएको सुरक्षा गोष्ठीलाई सम्बोधन गर्न आएका गृहमन्त्री गौतमले प्रेस चौतारी काभ्रेले आयोजना गरेको पत्रकार भेटघाटमा भारतका विदेशमन्त्री र प्रधानमन्त्रीको नेपाल भ्रमणले दुई देशबीचको सम्बन्धलाई अझ फराकिलो बनाउन र अस्पष्ट रहेका विषयहरुको समाधान गर्न सहयोग पुग्ने बताए।
उनले आगामी एक वर्षभित्र स्थानीय निकायको निर्वाचन गराउने सरकारको लक्ष्य रहेको पनि उल्लेख गरे।
नेकपा(एमाले)का कार्यवाहक अध्यक्षसमेत रहेका गौतमले नेपाल सरकारका मुख्यसचिव परिवर्तन गर्ने कुरामा कुनै सत्यता नरहेको पनि स्पष्ट पारेका थिए।
यसैबीच, मध्यमाञ्चलस्तरीय सुरक्षा गोष्ठीमा गृहमन्त्री गौतमले अपराध नियन्त्रणका नाममा मोलमोलाइ र उदासिनता आफूलाई मान्य नहुने बताए।
उनले नयाँ संविधान निर्माण नहुन्जेल जोखिमपूर्ण पूर्वअनुमान सुरक्षार रणनीति तयार गर्न सुरक्षा नियकाका प्रमुखलाई निर्देशन दिँदै स्थानीय निर्वाचन केन्द्रित सुरक्षा योजना बनाउनुपर्ने बताए।
मध्यमाञ्चलका ११ जिल्लाका नेपाल प्रहरी, सशस्त्र प्रहरी र राष्ट्रिय अनुसन्धानको जिल्ला प्रमुखहरुको सहभागिता रहेको सो गोष्ठीमा गृहसचिव सूर्यप्रसाद सिलवाल, मुख्य अनुसन्धान निर्देशक जीतबहादुर केसी, सशस्त्र प्रहरी महानिरीक्षक कोषराज वन्त, प्रहरी महानिरीक्षक उपेन्द्रकान्त अर्याल, क्षेत्रीय प्रशासन कार्यालय हेटौँडाका कामु क्षेत्रीय प्रशासक शङ्कप्रसाद कोइरालालगायतले सुरक्षा रणनीतिका बारेमा आ–आफ्नो धारणा राखेका थिए। रासस
