प्रधानमन्त्री एवम् नेपाली कांग्रेसका सभापति सुशील कोइरालाले एक महिना लामो स्वास्थ्य उपचार गरी फर्किएपछि पहिलो पटक पार्टी पदाधिकारीको बैठक गरेका छन्।
प्रधानमन्त्रीको सरकारी निवास वालुवाटारमा बिहीबार साँझ सम्पन्न बैठकमा मूलत: तीन विषयहरुमाथि सामान्य छलफल भएको बैठकमा सहभागी पार्टी सहमहामन्त्री पूर्णबहादुर खड्काले बताए।
'बैठकमा पहिलो विषय त उहाँको स्वास्थ्य उपचारपछिको अवस्थाको बारेमा जानकारी दिने काम भयो,' खड्काले भने। त्यसको अलावा सरकारले हालै घोषणा गरेको नयाँ नगरपालिकाको संरचना के कसरी निर्माण गर्न सकिन्छ भन्ने विषयमा पनि छलफल भएको थियो।
त्यसैगरी तेस्रो विषयका रुपमा भोलिदेखि भारतीय विदेशमन्त्री सुष्मा स्वराजले गर्ने नेपाल भ्रमणको विषयमा पनि छलफल भएको थियो।
सहमहामन्त्री खड्काले दिएको जानकारी अनुसार समसामयिक राजनीतिक विषयहरुका अलवा भारतीय विदेशमन्त्रीको भ्रमणकाबारेमा राजनीतिक दलहरुसँग परामर्श गर्न प्रधानमन्त्रीले संसदमा रहेका दोस्रो र तेस्रो ठूलो दल क्रमशः नेकपा एमाले र एमाओवादी नेताहरुसँग शुक्रबार बिहान बैठक गर्ने भएका छन्।
प्रकाशित मिति: 2014-07-24 19:35:50
