पुनरावेदन अदालतहरुमा मुख्य न्यायाधीश नियुक्ति गर्ने विषयमा छलफल गर्न बसेको न्यायपरिषद बैठक शुक्रबारलाई सरेको छ।
परिषद सदस्य समेत रहेका कानुनमन्त्री नरहरि आचार्य बैठकमा बस्न नपाउने भएपछि आजको बैठक सरेको हो।
अस्थायी र स्थायी गरी ८ जना मुख्य न्यायाधीशहरुलाई सर्वोच्च अदालतको न्यायाधीशमा नियुक्त गरेपछि अहिले १६ वटा पुनरावेदन अदालतमा मुख्य न्यायाधीशको पद रिक्त छ।
परिषदमा मुख्य न्यायाधीश नियुक्तको विषयले प्रवेश पाए पनि व्यक्ति विषेशमा औपचारिक छलफल नभएको परिषद सदस्य उपेन्द्रकेशरी न्यौपानेले बताए।
पुनरावेदन अदालतका न्यायाधीश मध्ये वरिष्ठताका आधारमा मुख्य न्यायाधीश बनाउने चलन छ।
वरिष्ठतालाई आधार मानेर नियुक्ति गर्ने हो भने बलराम विष्ट, दीपक कार्की, तेजबहादुर केसी, केदार प्रसाद चालिसे, मीरा खड्का, पुरुषोत्तम भण्डारी, सुरेन्द्रवीर सिंह बस्नेत, शम्भु खड्का, डिल्लीराज पौडेल,शारदा घिमिरे, पोषनाथ शर्मा,बमबहादुर श्रेष्ठ, दामोदर शाही, ईश्वर खतिवडा र आनन्दमोहन भट्टराई मुख्य न्यायाधीश बन्न सक्ने छन्।
न्यायपरिषदले यसअघि बनाएको न्यायाधीश नियुक्तिको मापदण्ड सर्वोच्च अदालतले खारेज गरिसकेको छ। उक्त मापदण्डले पुनरावेदन अदालतका वरिष्ठ न्यायाधीश बाहेक अदालतका कर्मचारी कानुनक्षेत्रमा विषेशज्ञता हासिल गरेका व्यक्तिहरु र वरिष्ठ अधिवक्ताहरुलाई मुख्य न्यायाधीश बनाउन सकिने व्यवस्था गरेको थियो।
प्रकाशित मिति: 2014-07-24 19:25:50
