भ्रष्टाचार गरेको अभियोगमा स्वास्थ्य सेवा विभागका निर्देशकसहित दसजना कर्मचारीलाई अख्तियार दुरुपयोग अनुसन्धान आयोगले निलम्बन गर्न निर्देशन दिएको छ।
हवाइ टिकटलगायतका नक्कली बिल पेस गरेर लाखौं भ्रष्टाचार गरेको अभियोगमा छानबिनका क्रममा अख्तियारले विभागका निर्देशक आनन्दकुमार श्रेष्ठसहित दस जना कर्मचारीलाई निलम्बन गर्न मंगलबार स्वास्थ्य मन्त्रालयलाई निर्देशन दिएको एक विज्ञप्ति जारी गर्दै बताएको छ।
नक्कली कागजात पेस गरी स्वास्थ्य सेवा विभागमा संगठित रुपमा भ्रष्टाचार भइरहेको उजुरीमा अख्तियारले छानबिन गरिरहेको छ। पदमा रहँदा उनीहरुले प्रमाण नष्ट तथा लोप गर्ने खतरा रहेकोले अख्तियारले उनीहरुलाई निलम्बन गरेर छानबिन अघि बढाउन लागेको हो।
अनुसन्धानबाट कार्यक्रम गरेको भन्दै हल नै नभएको होटेलमा हल भाडा लिएको बिल पेश गरेको खुलेको छ। यस्तै सामान नै खरिद नगरी होटेल तथा स्टेसनरी पसलको बिल पेश गरेको, भ्रमणआदेश बनाइ कार्यालय मै हाजिर गरेर हवाईजहाजको नक्कली टिकट पेश गरी दैनिक भ्रमण भत्ता लिएको पनि छानबिनबाट खुलेको अख्तियारले जनाएको छ।
स्वास्थ्य जस्तो संवेदनशील विषयमा बदनियतपूर्ण तवरले सरकारी सम्पत्ति हानिनोक्सानी पुर्याइ व्यक्तिगत लाभ लिइ पेश्की फर्छ्यौट गरेको अनुसन्धानबाट खुल्न आएको अख्तियारले जनाएको छ।
अख्तियारले विभिन्न कार्यक्रम सञ्चालनका लागि पेश्की लिइ भ्रष्टाचार गरेको भन्ने सम्बन्धमा स्वास्थ्य सेवा विभाग अन्तर्गतका सबै महाशाखाहरुको कार्यक्रमसँग सम्बन्धित फाइल झिकाएर अनुसन्धान गरिरहेको छ।