युक्रेनमा दुर्घटनाग्रस्त भएको मलेसियन बिमानको ब्ल्याक बक्स बिद्रोहीले मलेसियाका विज्ञहरुलाई हस्तान्तरण गरेका छन्।
दोनेत्स्कमा भएको छलफलपछि बिद्रोही नेताले बिमानका २ वटा डाटा रेकर्डर मलेसियन अधिकारीहरुलाई हस्तान्तरण गरेका हुन्।
संयुक्त राष्ट्रसंघीय सुरक्षा परिषदको बैठकमा सदस्य राष्ट्रहरुले बिमान दुर्घटना भएको स्थानमा अनुगमनकर्तालाई पूर्ण पहुँच दिनुपर्ने पक्षमा मतदान गरेपछि बिद्रोहीले डाटा रेकर्डर हस्तान्तरण गरेका हुन्।
डाटा रेकर्डरको माध्यमबाट बिमान दुर्घटनाको समय, ककपिटको आवाज लगायत रेकर्ड हुने भएकाले /दुर्घटनाको कारणबारे केही संकेत मिल्नसक्ने अनुमान गरिएको छ।
नेदरल्याण्ड्स्को अम्स्टर्डमबाट मलेसियाको क्वालालम्पुरका लागि उडेको मलेसियन एयरलाईन्सको बिमान युक्रेनको लुहान्स्कमा गत विहिबार दुर्घटना हुँदा त्यसमा सवार सबै २ सय ९५ जनाको मृत्यु भएको थियो। सो बिमानलाई क्षेप्यास्त्र प्रहार गरी खसालिएको आशंका गरिएको छ ।