काठमाडौं त्रि चन्द्र कलेजको विपी पुस्तकालयमा आइतबार दिउँसो आगलागी हुदाँ ५ हजार पुस्तक र २ हजार थेसिस खरानी भएको छ ।
पुस्तकालय र क्यान्टीनमा आगलागी भएको हो । दिउँसो १ बजेतिर लागेको आगो काठमाडोंका तीनवटा दमकले २ बजेतिर निभाएको थियो । आगलागीबाट भएको क्षतिको एकिन विवरण त्रिचन्द्र क्याम्पसले दिएको छैन् । अनेरास्ववियु र नेवि संघका विद्यार्थीहरुबीच झडप भएपछि आगलागी भएको हो ।
अनेरास्ववियुका सचिवालयका प्रचार विभाग प्रमुख अशेष घिमिरेका अनुसार क्याम्पस समिति सदस्य प्रेम केसी त्रिचन्द्र क्याम्पसस्थित पुस्तकालयमा पढेर बसिरहेका बेला नेविसंघका नेता कमल बुढाको नेतृत्वमा आएको जत्थाले खुकुरी प्रहार गरी आगजनी गरेका हुन्। कमल बुढा बाजुराऔ काठमाडौँ विद्यार्थी सम्पर्क समितिका नेता हुन्।
केसीलाई प्रहार गरेको खुकुरी प्रहरीले बरामद गरेको छ। खुकुरी प्रहारले घाइते भएका केसीको अहिले पुतलीसडकस्थित मोडल अस्पतालमा उपचार भइरहेको छ।
नेविसंघका प्रवक्ता युपी लामिछानेले व्यक्तिगत रिसइवीका कारण उक्त घटना भएको उल्लेख गर्दै घटनामा जो सहभागी भए पनि कारबाहीका लागि माग राख्ने बताए। घटनामा सम्लग्न कसैलाइ पनि प्रहरीले पक्राउ गरेको छैन ।