नवनिर्वाचित एमालेका अध्यक्ष केपी शर्मा ओलीले पार्टीलाई हरिण झै दाैडाउँने बताएका छन्।
काठमाडौंको तिनुकनेस्थित रोयल इभेन्टमा केन्द्रीय सदस्यहरुलाई दिवा भोज दिएको कार्यक्रममा बोल्दै उनले पार्टीलाई हरिण गतिमा कुदाउनु अहिलेको आवश्यकता भएको बताएका हुन्।
उनले पार्टीलाई बैचारिक हिसाबले तेजिलो, धारिलो, सांगठनिक रुपमा एकता, व्यवहारिक रुपमा गतिशिलता र जुझारु बनाउनुपर्ने बताए। महाधिवेशनका क्रममा पार्टीमा दुई पक्षका नेताहरुहरुबीच केही घच्चघच्च भएको उनले स्वीकारे । एउटै खाटमा सुत्दा खुट्टा लाग्ने उनको भनाइ थियो।
'फरक फरक ठाउँमा सुतेको भए खुट्टा लाग्दैनथ्यो, एउटै खाटमा सुत्दा खुट्टा लाग्छ' उनले भने 'अब यसलाई बिर्सनुपर्छ।' एमाले बनाउनकै लागि दुई पक्षका नेताहरु बेलाबेलामा घच्चघच्च भएको उनले बताए।
कार्यक्रममा उनले युएईका प्रधानमन्त्रीले लेखेको 'माइ भिजन' नामक पूस्तकको केही अंश पढेर सुनाएका थिए।
उनले युएईका प्रधानमन्त्रीले लेखेको पूस्तकलाई इंकित गर्दै भने 'अफ्रिकाको जंगलको एउटा कुनामा एकाबिहानै सिंह उठ्छ, जिउ तान्छ र विचार गर्छ हरिणलाई खान छिटो कसरी कुद्नुपर्छ भनेर माइन्ड सेट गर्छ। भोको बसे मरिने सोच्छ।
त्यहिँ जंंगलको अर्को कुनामा हरिण उठ्छ, जिउ तन्काउछ उफ्रिन्छ, म छिटो नकुँदे सिंहले खान्छ भन्ने हिसाबले छिटो कुद्ने योजना बनाउँछ। छिटो कुदन नसके सिहँ भोकै मर्ने स्थिति हरिण छिटाे नकुदे मारिने अवस्थामा पुग्छ।' यहाँ कुरा गतिकै आयो कार्यक्रममा ओलीले भने 'आफूहरु पनि पछि परिए अर्काले खानेछ।'
निवर्तमान अध्यक्ष झलनाथ खनाल पत्थरीको उपचार तथा नेता माधवकुमार नेपाल भारतमा रहेका कारण अनुपस्थित भएका थिए । उपाध्यक्ष भीम रावल, सचिव योगेश भट्टराइ लगायतका नेताहरु भने दिवाभोजमा देखिएनन् । उपाध्यक्ष युवराज ज्ञवाली, सचिव घनश्याम भूषाल भने कार्यक्रममा देखिएका थिए।
ओलीेले कार्यक्रममा १४ मिनेट बोलेका थिए । महाधिवेशन र त्यस अघिका कार्यक्रममा भन्दा ओली निकै तन्दुरुस्त देखिन्थे ।
