एमाले अध्यक्षमा विजयी भएपछि केपी शर्मा ओलीले सबै केन्द्रीय सदस्यहरुलाई भब्य भोजको आयोजना गरेका छन् । लन्चका लागि उनले आइतबार बिहान १० बजे काठमाडौंको तिनकुनेस्थित रोयल इभेन्टमा सबै केन्द्रीय सदस्यहरुलाई डाकेका छन् ।
सबै केन्द्रीय सदस्यहरुलाई ओली आफैले एसएमएस गरेर बोलाएका छन् । अध्यक्षमा विजयी भएपछि खुसीयालीमा ओलीले भोजको आयोजना गरेको उनी निकट एक नेताले बताए ।
एमाले उपाध्यक्ष भीम रावलले अध्यक्षले बोलाएको लन्चमा सहभागी हुने सेतोपाटीलाई जानकारी दिए ।
सचिव योगेश भट्टराई भने जाने नजाने दोधारमा छन् । 'अध्यक्ष ज्यू ले लन्चका लागि बोलाउनुभएको छ, मेरो केही व्यक्तिगत काम पनि छ, जाने कि नजाने भन्ने बारेमा निर्णय गरिसकेको छैन्' उनले भने ।
केन्द्रीय सदस्य विरोध खतिवडाले पनि अध्यक्षले लन्चका लागि बोलाएको बताए ।
'म नारायणी अंचल इन्चार्जमा चयन भएपछि पार्टीको कामले हेटौंडा आएको छु' उनले भने 'म चाहि जान सक्तिन ।'
भोजमा ओलीले केन्द्रीय सदस्य १ सय ५९ जना सहित नजिकका आफन्तलाई बोलाएका छन् ।
२ सय जना भन्दा बढीलाई खानपिनको व्यवस्था मिलाउन उनले रोयल इभेन्टलाई अर्डर दिएका छन् । नेता माधवकुमार नेपाल भने भारतमा रहेका कारण ओलीको भोजमा सहभागी नहुने निश्चित भएको छ । विरामी बहिनीलाई भेटन उनी ३ दिनअघि नयाँदिल्ली गएका हुन् ।
