मुटु विरामी अमी रिसालको उपचारमा लापरबाही गरेको भनि मन्त्रिपरिषद् सचिवालयले नर्भिक अस्पताललाई आवश्यक कारबाही गर्न स्वास्थ्य मन्त्रालय र मेडिकल काउन्सिललाई निर्देशन दिएको छ।
'अमी रिसालको उपचारमा लापरबाही भएको घटनामा विज्ञ चिकित्सकबाटै छानबिन गराई यथाशिघ्र सत्यतथ्य उजागर गरि दोषी जो कोहि भएपनि बिना मोलाहिजा कडा कारबाही गर्नु,' निर्देशनमा भनिएको छ।
काउन्सील र स्वास्थ्य मन्त्रालयलाई लेखेको निर्देशन पत्रमा कारबाहीको जानकारी गराउन पनि भनिएको छ। मन्त्रिपरिषद् सचिवालयले निर्देशन अनुसार छानबिन र कारबहीका लागि स्वास्थ्य सचिवलाई 'फोकल प्वाइन्ट' तोकेको छ।
मन्त्रिपरिषद् स्रोतका अनुसार मुख्य सचिव लीलामणि पौडेलको अग्रसरतामा 'नर्भिकको लापरबाहीमा छानबिन'को पत्र लेखिएको हो। पत्र लेख्नुअघि पौडेल र मन्त्रिपरिषद्का अर्का सचिव शान्तराज सुवेदीले विज्ञ चिकित्सकसँग अनौपचारिक परामर्श गरेको जानकारी पनि स्रोतले दिएको छ।
'अमी रिसालको केसमा गम्भिर लापरबाही देखिएकाले अस्पताल तथा चिकित्सकलाई कारबाही गर्ने प्रशस्त ठाउँ रहेको विज्ञको राय आएपछि बल्ल पत्र लेखिएको हो,' मन्त्रिपरिषद्का एक सहसचिवले भने।
