काठमाडौं प्रहरीका प्रमुख रमेश खरेल 'एआइजी बन्न ब्रिफकेश ओसारपसार भइरहेको' धारणा व्यक्त गरेवापत गृहमन्त्रीदेखि प्रहरी हेडक्वार्टरसम्मको आँखी बनेका छन्। (समाचार पढ्नुहोस् के भनेका थिए खरेलले-डिआइजीहरु एआइजी बन्न ब्रिफ केश बोकेर मन्त्री र नेताको घरघरमा) बयानका लागि मुख्यालय तानिएर थन्किएका छन्। तर, प्रहरीका केहि बहालवाला डीआइजीले नै खरेलले अनुमान लगाए झैं एआइजी बढुवामा ब्रिफकेश कारोबार भएको ठोकुवा गरेका छन्।
त्यसको छानबिनका लागि उनीहरुले आइजीपी उपेन्द्रकान्त अर्यालसँग माग गरेका छन्। प्रहरी मुख्यालयका केही उच्च अधिकारीसहितको बैठकमा डिआइजी गणेश राईले त्यस्तो माग गरेका हुन्।
स्रोतका अनुसार प्रहरी प्रधान कार्यालयमा बसेको उक्त बैठकमा राईको धारणालाई अर्का डिआइजी नारायण बास्ताकोटी, यादव थपलिया लगायतले समर्थन जनाएका थिए।
बास्ताकोटी र राई सिनयरिटी तथा कार्यसम्पादनको हिसाबले अगाडि भएर पनि बढुवाबाट वञ्चित डिआइजी हुन्।
'बढुवा प्रकरणले प्रहरी संगठनलाई सुडान घोटाला जत्तिकै बदनाम गर्यो,' राईलाई उदृत गर्दै स्रोतले भन्यो, 'काठमाडौं प्रहरी प्रमुखले भनेजस्तै ब्रिफ्केस ओसार्नेहरु नै रोजाइमा परे।'
राईले आइजीपीसँग 'ब्रिफकेश' छानविनको माग गरिरहँदा बढुवा सिफारिशमा परेका रमेशशेखर बज्राचार्य, विज्ञानराज शर्मा लगायत डिआइजीहरु उपस्थित थिए।
खरेलले उठाएको मुद्दालाई गम्भीर रुपमा लिन राईले आइजिपीसँग पटक पटक माग गरेका थिए। 'काठमाडौं प्रहरी प्रमुख खरेलले सूचनाको आधारमा त्यस्तो जनाउ दिएका हुन्,' उनले जिकिर गरे, 'थप छानबिनमा सिआइविलाई लगाउनुपर्छ।'
राईले यति भनिसकेपछि आइजिपी अर्यालले खरेलको भनाईबारे जारी छलफलको निचोडलाई पर्खिन आग्रह गरे। 'विज्ञानराज शर्माको छानबिनमा केहि आधार फेला परेर सिआइवीलाई लगाउनुपरे पनि लगाउला,' अर्यालले कुरा टुङ्याउन खोजे।
अहिले बढुवामा परेका र नपरेका धेरैजसो आकांक्षीहरु इन्सपेक्टरदेखि नै आइजिपी अर्यालका टोलीका हुन्। सात जनालाई एआइजीमा बढुवा गर्दा २ नम्बरका वास्ताकोटी र ७ नम्बरका राईलाई पन्छाएर कनिष्ठहरु सिफारिशमा परेका छन्। (हेर्नुहोस् समाचारमा-बरियता मिचेर गरेको एआईजी सिफारिसमा बस्ताकोटी र राई परेनन्)
गृह सचिव संयोजक रहने सिफारिश समितिमा आइजिपी अर्याल पनि सदस्य हुन्। रोलक्रम मिचेर ल्याइएका वीरेन्द्रबावु श्रेष्ठ र प्रतापसिंह थापा उनीहरु दुईभन्दा बढी विवादास्पद् पनि हुन्।
राईले डिआइजीको हैसियतले आफूले गरेको उल्लेख्य काम पनि आइजिपीलाई स्मरण गराए।
'उपत्यका प्रहरी प्रमुखको रुपमा मापसे कारबाहीलाई मैले सशक्त ढंगले लागू गराएको हुँ,' राईले साथीभाईहरुसँग पनि भन्ने गरेका छन्, 'काठमाडौं, ललितपुरको सडक चौडामा पनि फिल्डमा सबैभन्दा खटेको मै हुँ।'
सिफारिशबाट वञ्चित सिनियरिटीको हिसाबले दुई नम्बरमा रहेका वस्ताकोटी लेनदेन विवादमा नपरेका प्रहरी अधिकृत हुन्। प्रहरी संगठनबारे जानकार गृहका एक उच्च अधिकारीले दिएको जानकारी अनुसार बास्ताकोटीले डिआइजीको रुपमा औसतभन्दा राम्रेा छाप छाडेका छन्।
एयरपोर्टको सुरक्षा प्रमुख रहँदा 'सुधार'को अगुवाई गरेकोमा उनले उतीबेला स्यावासी पाएका थिए। प्रहरी मानव संशोधन विभाग प्रमुखको रुपमा भर्ना छनोट निष्पक्ष बनाउन वस्ताकोटीले पनि योगदान पुर्याएको दाबी गर्नेहरु पनि छन्।
गणेश राईले वस्तुगत तर्कहरु दिन थालेपछि आइजिपी कुरा अन्तै पुर्याएर तर्किएका थिए। स्रोतहरुले दिएको जानकारी अनुसार बढुवाबाट वञ्चित तीन जना डिआइजीलाई अर्यालले बढुवा सूचीबाट आफू नै सन्तुष्ट नभएको बताएका छन्।
'मै फिप्टी फिप्टी भन्छु,' अर्याललाई उदृत गर्दै गृहका एक सहसचिवले भने, 'सिफारिश समितिले बचाउ गर्न नसक्ने सिफारिश कति खोटपूर्ण छ भन्ने एउटा प्रमाण यहि हो।'