एमालेको वरिष्ठ नेता भएर पनि आफैले खुलामञ्चबाट भ्रष्टाचारी घोषणा गरेको वामदेव गौतमको सल्लाहकारको जागिर खाएको भनि आलोचित प्रदीप नेपालले आफ्नो नियुक्तिको बचाउ गरेका छन्।
गौतमका नवनियुक्त सल्लाहकार नेपालले गौतमलाई भ्रष्टाचारी घोषणा गर्ने आफू नै भएको बताएका छन्। त्यतिमात्र हैन एमाले फुटाएका गौतमलाई एक सिट पनि जित्न नदिनमा पनि आफ्नो योगदान रहेको दाबी उनको छ। चार दिनअघि एमालेका प्रभावशाली नेता नेपाललाई सरकारले गौतमको सल्लाहकारमा नियुक्त गरेको थियो।
मन्त्रीको सल्लाहकारमा सामान्यतया कनिष्ठ राजनीतिज्ञ वा विज्ञहरु नियुक्त हुन्छन्। गौतम भन्दा धेरैपटक महत्वपूर्ण मन्त्रालयको नेतृत्व गरेका नेपाल पार्टीभित्र पनि उत्तिकै महत्वपूर्ण भूमिकामा रहँदै आएका नेता हुन्।
कोअर्डिसेन केन्द्र, नेकपा माले, एमाले हुँदै चार दशकदेखि सक्रिय राजनीतिमा रहेका नेपालले जागिर खाएको भनि आलोचना भइरहेको बेला उनको यस्तो प्रतिक्रिया आएको हो।
नेपालले मंगलवार दिउँसो आफ्नो फेसबुक स्टाटसमा गौतमलाई अहिलेको हैसियतमा पुर्याउनमा पनि आफ्नो योगदान रहेको घुमाउरो दाबी गरेका छन्। फुटको चारवर्षपछि माले नेताहरुलाई एमालेमा फर्काउने गृहकार्य पनि आफ्नो भएको दाबी नेपालको छ।
'पार्टीमा फर्केका गौतम लगायत नेतालाई पार्टी स्थायी कमिटीमा लैजानु पर्छ पनि मैले नै भनेको हुँ,' नेपालले लेखेका छन्, 'उहाँले पाएको उपाध्यक्षको मत पनि एउटा मेरो पनि छ।'
एमाले संसदीय दलको निर्वाचनमा केपी ओली र वामदेव गौतमको समिकरण बनाउन आफू खुलमखुला लागेको उनले बताए।
'त्यो लुकेर गरेको होइन माधव र जेएन (झलनाथ खनाल) दुबै कमरेडलाई थाहा दिएरै गरेको हुँ।'
नेपालको सल्लाहकार नियुक्तिप्रति पार्टीका धेरै नेता असन्तुष्ट छन्। युवा नेता योगेश भट्टराईले नेपालको नियुक्तिको सार्वजनिक आलोचना गरिरहेका छन्। नेपालले असन्तुष्टहरुलाई पनि संवोधन गरेका छन्।
'साथीभाइ हो, कोठामा बसेर अर्ति र गाली गर्न धेरै सजिलो हुन्छ, तर काम गर्न, अहिले नभनौं,' उनले लेखेका छन्।
