अहिले नेपाल सरकारले लामो दूरीमा चल्ने सबैखाले सवारी साधनमा क्षमताभन्दा बढी यात्रु नराख्न तथा तोकिएको भन्दा बढी भाडा नलिन सम्बन्धितलाई कडा निर्देशन दिएको भन्ने समाचारहरु सुन्न र पढ्न पाइन्छ।
विशेष गरी काठमाडौंको बल्खुस्थित सुमो सेवाका काउण्टरहरूले दसैंको समयमा यताबाट मात्र यात्रु ओसार्नुपर्ने र उताबाट खाली फर्किनुपर्ने भन्दै टिकटमा तोकिएकै मुल्य उल्लेख गर्ने तर यात्रुबाट थप रकम लिने गरेका छन्। मैले काठमाडौंबाट सर्लाहीसम्म जानको लागि रू ७०० दरका टिकट काटेँ। तर मैले ७०० अंकित टिकटमा १ हजार रूपैयाँ तिर्नुपर्यो।
दसैंको समयमा जसरी भए पनि आफ्नो गन्तव्यमा पुग्नुपर्ने भएकाले मैले निरीह बन्दै १ हजार रूपैयाँ तिरेँ। सरकारको भरपर्ने हो भने दसैं नै मान्न घर जान नपाउने हो कि भन्ने चिन्ता बढेर म जस्ता अधिकांशा यात्रुले ३०० बढी पैसा तिरेर टिकट काटिरहेका छन्।
धेरैजसो सुमोले सिट क्षमताभन्दा बढी यात्रुसमेत निस्फिक्री बोकेर हिँडिरहेका छन्। बाटोमा ५ भन्दा बढी चेकिङ पोइन्टहरु भेटिन्छन् तर त्यहाँ रहेका ट्राफिक तथा गाडीका स्टाफहरुबीच खासखुस के के कुराकानी हुन्छ विना रोकटोक ती गाडीहरु गन्तव्यतर्फ छाडिन्छन्, यात्रुहरु एकपटक यात्रा गर्ने त हो नि भन्दै तै चुप मै चुप भइरहेका छन् नेपालको कानून दैवले जानुन्।
बज्र बस्नेत,
चन्द्रागिरि– १३, काठमाडौं
basnet07@gmail.com