आइतबार सेतोपाटीमा प्रकाशित अस्पतालले उपचारमा ठगेको आरोप शीर्षकको समाचार प्रति हाम्रो ध्यानाकर्षण भएको छ।
यो समाचार सरासर भ्रमपूर्ण समाचार भएको जानकारी गराउन चाहन्छौं।
अब कुरा गरौं समाचारमा उल्लेखित युवराज कार्कीको घटनाको, उनले अस्पतालको रेकर्डमा आफ्नो नाम युराज कार्की लेखाएका छन्। मिर्गौलामा हुने पत्थरीको रोग क्रोनिक रोग हो र मान्छेलाई एकपटक मिर्गौलामा पत्थरी रोग लागे पछी फेरि-फेरि यो दोहोरिरहन्छ।
म युरोलोजी विषयको प्राध्यापक भएको नाताले यो कुरा भन्न चाहान्छु कि विश्वको तथ्यांकअनुसार ५०% ब्यक्तिलाई ५ वर्ष भित्रमा र ७०% ब्यक्तिलाई १० वर्षमा फेरि यो रोग दोहोरिन्छ।
उनको काम गर्ने एउटा मात्रै मिर्गौला- दायाँ मिर्गौला, त्यसमा पनि पत्थरी रोगको कारण केही वर्ष अगाडि अपरेशन भईसकेको थियो र त्यो अपरेशन दोस्रो थियो। उनको दोस्रो पटक पनि दायाँ पट्टीकै मिर्गौलामा रहेका पत्थर देखा परेर फेरि पनि अपरेशन गर्नुपर्ने भएको थियो ।
तर उनले म कुनै पनि हालतमा अपरेशन नचिरीकन गराउँछु र त्यसको लागि ग्राण्डी अन्तर्राष्ट्रिय अस्पतालमा रहेको संसारमै अति उत्तम पद्धति मानिएको RIRS पद्धतिबाट निकाल्छु भनेर भनेको हुँदा सोही अपरेशन गरिएको थियो। अपरेशन गर्नको लागि आवश्यक पर्ने जाँचहरू गरि सकेपछि बिरामीलाई बताउनुपर्ने अपरेशनको तरिका, त्यो अपरेशन गर्दा देखिनसक्ने जटिलताहरू, कुनै पनि जटिलता देखिएमा गर्नुपर्ने शल्यक्रिया लगायतका प्रकृयाहरूकोबारे सम्पूर्ण रूपमा उनलाई सम्झाई सकेपछि मात्र अपरेशन गरिएको थियो। (यी सबैकुराहरू हुन सक्छन् भनेर बिरामीलाई अपरेशनभन्दा अगाडि बताएर उनले दिएको मन्जुरीनामा समेत हामीसँग सुरक्षित छ। आवश्यक परेमा सही ठाउँमा उक्त मन्जुरीनामा देखाउने छौं। समाचारमा बिरामीका कागजातहरू पोष्ट गर्नु उपयुक्त हुँदैन)।
अपरेशनको क्रममा Ho-YAG laser ले RIRS पद्धतिबाट उनको दायाँ मिर्गौलामा असर पारिरहेका पत्थरलाई धुलो पारिएको थियो जुन धुलो पिसाबमा बगेर निस्कन्छ तर त्यस मध्य एउटा सानो पत्थर जुन X Ray मा देखिने तर मृगौलाभित्र रहेका कुनै पनि कोठाहरूमा नदेखिने (मृगौलाको गुदी-मासु भित्र गडेको) ढुंगा निकाल्न सकिएको थिएन।
सो ढुंगाले मिर्गौलामा कुनै पनि नराम्रो असर नपार्ने र निकाल्न जबरजस्ती गर्दा रक्तश्राव भएर मृगौला नै गुमाउन पर्ने स्थिति आउन सक्ने हुँदा सो ढुंगालाई छोड्नु परेको थियो। यसको बारेमा अपरेशन पश्चात बिरामीलाई पनि कुनै कुरा नलुकाई बताईएको थियो र अपरेशनको सम्पूर्ण भिडियो र अपरेशन पश्चात सिटी स्क्यान गरेर पनि बिरामीलाई दिईएको छ।
मृगौलाको पत्थर निकाल्दा सम्पूर्ण पत्थरहरू ननिस्किएर केही छुट्ने कुरा नौलो होईन। यस्ता घटनाहरू हरेक अस्पतालहरूमा सधै भरि भई रहन्छन् र त्यस्ता पत्थरहरू निकाल्न खोज्दा बिरामीको ज्यान नै जान सक्ने अथवा मिर्गौला नै निकाल्न पर्ने भएमा पत्थर छोडेर नै आउने गरिन्छ र यो मेडिकल एथिक्स भित्र पर्ने एउटा पाटो पनि हो।
यो समाचारबाट कसैलाई भ्रम नहोस्। धन्यवाद।
प्रा.डा. प्रेमराज ज्ञवाली
अध्यक्ष,
युरोलोजी तथा ट्रान्सप्लान्ट मेडिसिन बिभाग
ग्रान्डी अन्तर्राष्ट्रिय अस्पताल