जय नेपालको न्यानो अभिवादन दाजु,
हाम्रो भेट नभएको लगभग ६ वर्ष हुन लागेछ। म विश्वस्त छु तपाईंको स्मृतिमा म छैन। तर म जस्ता हरेक युवाले देशको एकै मात्र युवा नेताको नाम लिन परे गगन थापा बाहेकको नाम सायदै लिन्छ। म त झन् कांग्रेसको छहारीमा हुर्केको मान्छे, तपाईंले भने जस्तै शरीरमा वी पीको रगत हैन मस्तिष्कमा वीपीको विचार बगिरहेको २८ वर्ष लाग्दै गरेको युवा, तपाईंप्रति मेरो सम्मान र आस्था कति छ भन्ने कुराको मापन सायदै गर्न सकिएला। तपाईंलाई युगपुरुष भन्न रुचाउछु म। मेरो पुस्ताले तपाईंजस्तो युवा नेता पाएको छ। गर्वले छाती फुलेर आउँछ। विपरित विचारधाराका मान्छेहरु पनि गगन वास्तविक नेता हुन्, कांग्रेसमा वीपी र गणेशमानको फेरि जन्म भएको छ भन्ने गर्दछन्।
दाजु तपाईंले धेरै देशको भ्रमण गर्नुभएको छ, थाहै छ तपाईंलाई देशका ५० लाख युवाको दैनिकी कस्तो छ भनेर। त्यसैले यहाँ फेरि बयान गरेर तपाईंको अमूल्य समय किन बर्बाद गरुँरु
नेपालमै बसेर केही गर्ने दृढ संकल्प थियो। तर म जस्तै संकल्प गर्ने लाखौं युवाको जोशलाई नेपालले थेग्न सकेको छैन। १२ वर्षसम्म युद्ध भयो। हजारौं मान्छेको मारिए। हजारौं बेपत्ता पारिए। तिनका परिवारको अवस्था कति दर्दनाक छ अहिले, त्यो मलाई भन्दा तपाईंलाई नै बढी थाहा छ। उत्तिकै मात्रामा थाहा नभएपनि बेखबर भने कोही छैनन्। एक दशक भन्दा बढी विकास निर्माणका काम ठप्प भए। एतिहासिक धरोहरहरु भत्काइए। इतिहास मेटाउन खोजियो।
जति पीडा भएको भए पनि शान्ति सम्झौतापछि आशाको किरण छायो। जनताले समृद्धिको सपना देख्न थालिसकेका थिए। सबैमा जोश जाँगर थियो। त्यो सपना, त्यो जाँगर धेरै दिन कायम रहन सकेन। १० वर्ष युद्ध लडेका लडाकुहरु निराश भएर पासपोर्ट बोकेर म्यानपावर धाउन थाले। आज ती दिनलाई सम्झिदै, बाँडिएका मिठा सपनाहरुलाई सम्झिँदै अरब र मलेशियामा पैसासँग पसिना साँट्दैछन्।
युद्ध विसर्जनसंगै सबै सपनाहरु मृत भए। त्यो युद्ध केवल कसैलाई सत्ता र शक्तिमा पुर्याउनको लागी मात्रै भएको रहेछ भन्ने कुरा छर्लंगै भईसक्यो। तपाईंलाई जानकारी छैन भन्ठानेर मैले यी कुराहरु पत्रमा उल्लेख गरेको होइन। मैले यो कारणले देश ठप्प हुँदा युवाहरु विदेशिन बाध्य भए भनेर जोड्न मात्रै खोजेको हुँ।
पाँच वर्ष हुन लाग्यो दाजु म अमेरिका आएको। लालबाबु पण्डितले भनेजस्तो देशको माया नभएर मैले अमेरिकाको ग्रिनकार्ड लिएको कदापी हेइन। यो रहर होइन, बाध्यता हो। तर म जस्ता धेरै युवाहरु आफ्नै देशमा फर्केर राष्ट्र निर्माणमा योगदान दिन चाहन्छन्। मैले पनि योजनाहरु बनाइरहेको थिएँ। यहाँ कमाएर बचाएको पैसाले नेपालमै गएर लगभग २० रोपनी पाखो बारीमा कम्पाउण्ड लगाएर गाई र बाख्रा पाल्ने योजनालाई मूर्त रुप दिने अठोट गरेको थिएँ मैले। मलाई अमेरिकी नागरिकता लिने कुनै चाहना थिएन। तर दाजु एकाएक मेरो मन यसरी मर्यो कि म बयान गर्न असमर्थ छु।
कांग्रेस महामन्त्रीमा तपाईंको उम्मेदवारीको चर्चा चलेदेखिनै म निकै उत्साहित थिएँ। तपाईंको पुस्तामा यति छिट्टै नेतृत्व हात पर्यो भने २० वर्षमा समुन्नत र समृद्ध नेपालको कल्पना पक्कै गर्न सकिन्छ। सिर्जनशील, लगनशील र कर्मठ युवापुस्ताको प्रतिनिधि नेपाली कांग्रेस पार्टीको महामन्त्रीजस्तो कार्यकारी पदमा निर्वाचित हुनुभयो र युवा प्रतिनिधि सहितको तपाईंको कार्यकारी नेतृत्व पाएमा नेपाली कांग्रेस राजनीतिक रुपमा इमान्दार पार्टी बन्न सक्थ्यो। नेपाल जति पनि बिग्रेको छ, नेता इमानदार नभएर नै बिग्रेको छ।
हामी जनता पनि नेतालाई दोष लगाएर पन्छिने गर्छौं। यसरी दुईतर्फी बदमासीले देश तहसनहस भइसक्यो। सबैको आशा र भरोसा युवा पुस्तामै छ। युवापुस्तालेनै देशलाई यो स्थितिबाट बाहिर निकाल्न सक्छ। त्यसमा पनि तपाईंको नेतृत्वदायी भूमिका देशले खोजेको अवस्थामा कांग्रेस महाधिवेशनमा तपाईंको हारले सबैलाई निराश बनाएको छ। वास्तवमा तपाईंको हारको कारण के थियो त, त्यो बारेमा सबैभन्दा बढी तपाईंलाई नै थाहा होला।
आखिर हार्ने गरी उम्मेदवारी किन दिनुभयो? के तपाईं जस्तो नेताले त्यसको विश्लेषण गर्नुभएको थिएन? या विश्लेषण गरेर हार्छु भन्ने थाहा हुँदाहुँदै भावी बार्गेनिङको निम्ति उम्मेदवारी दिनुभएको थियो? तपाईंबाट आम युवाहरुले जवाफ चाहिरहेका छन्। हो चुनावी मैदानमा उत्रेपछि हारलाई स्वभाविक रुपमा लिन सक्नुपर्छ। तर तपाईंलाई स्वभाविक लागेपनि, हामी आम युवाहरुलाई भने यो स्वभाविक लागेको छैन दाइ। एउटै प्रश्न सबैको मनमा छ, आखिर गगनले हार्ने चुनाव किन लडे त? अब गगनलाई अरु कांग्रेसीभन्दा फरक र उच्च दर्जामा राखेर हेर्ने आधारहरु सकिएका हुन्? अब हाम्रै कालमा देश समृद्ध भएको हेर्न पाउने आश नगर्दा हुने हो? मेरो पाखो बारीमा विकासका पूर्वाधारहरु पुगेर त्यहॉ गाई बाख्रा पाल्ने सपना अपूरै रहने हो त?
कति गुनासो गर्ने दाजुरु यो पत्र सायद अब यहीँ बिट मार्नुपर्छ होला। आम युवामा छाएको निराशालाई फेरि आशामै बदल्न सक्षम हुनुहोस्। तपाईं लगायत कांग्रेसजनलाई मेरो शुभकामना!
(क्यालिफोर्निया, अमेरिका)
